Հայաստանի խաղաղապահ բրիգադի մարտավարական վարժանքները կանցկացվեն հոկտեմբերի 12-16-ը
Երեքշանթի Երևանում անցկացվեց հայ-ամերիկյան շտաբային վարժանքն ավարտելու կապակցությամբ զինծառայողներին վկայագիր հանձնելու արարողությունը:
«Այսօր ավարտվեց պաշտպանական համագործակցության հայ-ամերիկյան ծրագրի կարևոր մի միջոցառում։ Ավարտվեց Հայաստանի ԶՈՒ խաղաղապահ բրիգադի, սպայական կազմի և Գլխավոր շտաբի մի շարք վարչությունների ներկայացուցիչների համար կազմակերպած ութշաբաթյա հայ-ամերիկյան շտաբային վարժանքը»,- վկայագիր հանձնելու արարողության ընթացքում հայտնեց Հայաստանի Զինված ուժերի Գլխավոր շտաբի պետի առաջին տեղակալ, գեներալ-լեյտենանտ Էնրիկո Ապրիամովը։
Ըստ նրա, նման շտաբային վարժանքները Հայաստանի ԶՈՒ-ում առաջին անգամ են անցկացվել։
Նա նշեց, որ վարժանքների մասնակիցներն առաջին լուրջ քննությունը կհանձնեն ընթացիկ տարվա հոկտեմբերի 12-ից-16-ը։ Կանցկացվեն խաղաղապահ բրիգադի մարտավարական վարժանքներ՝ հատուկ չափանիշներով օպերատիվ հնարավորությունների ստուգմամբ։
Ապրիամովը նաև շնորհակալություն հայտնեց Հայաստանում ԱՄՆ դեսպանության ռազմական կցորդին և ամերիկացի հրահանգիչներին շտաբային վարժանքների կազմակերպման և բարձր մակարդակով անցկացնելու համար։
Իր հերթին Հայաստանում ԱՄՆ դեսպանության ռազմական կցորդ, գնդապետ Ռոբերտ Վեբսթերը շնորհակալություն հայտնեց Հայաստանի պաշտպանության նախարարության և խաղաղապահ բրիգադի սպաներին։
«Հայաստանի նախագահն ու պաշտպանության նախարարը բազմիցս ասել են, որ ԶՈՒ և կառավարության համար կարևոր է, որպեսզի Հայաստանը ոչ միայն լինի անվտանգության սպառող, այլ ակտիվ մասնակցություն ունենա դրա ապահովման գործում»,- ասաց Վեբստերը։
Սկսած մարտի 30-ից՝ ԱՄՆ դեսպանության ռազմական համագործակցության գրասենյակի և ԱՄՆ ԶՈՒ Եվրոպական հրամանատարության նախաձեռնությամբ Հայաստանի պաշտպանության նախարարության խաղաղապահ բրիգադում գործում է խաղաղապահներ պատրաստող հրահանգիչների արտագնա խումբ։
ԱՄՆ դեսպանության ռազմական համագործակցության գրասենյակը Հայաստանում գործում է ԱՄՆ առաքելության և Շտուտգարտում տեղակայված ԱՄՆ ԶՈՒ Եվրոպական հրամանատարության հովանու ներքո։ -0-
