Հայաստանը Լեռնային Ղարաբաղի հարցում երբեք միակողմանի զիջումների չի գնա, ասաց Հայաստանի Հանրապետական կուսակցության խորհրդարանական խմբակցության քարտուղար Էդուարդ Շարմազանովը:
«Առաջընթացի մասին հայկական և թուրքական կողմի պատկերացումները տարբեր են, և եթե առաջընթաց հասկացության տակ Թուրքիան հասկանում է միակողմանի զիջումներ հայկական կողմից, ապա թող մոռանա դրա մասին. հայկական կողմը երբեք չի գնա միակողմանի զիջումների և կարծում է, որ ղարաբաղյան խնդրում հիմնական հարցը Լեռնային Ղարաբաղի կարգավիճակն է, որը, փաստորեն, չի կարող ավելի ցածր լինել, քան այժմ: Այսօր Լեռնային Ղարաբաղը փաստացի անկախ պետություն է», - երեքշաբթի «Նովոստի» միջազգային մամուլի կենտրոնում ասաց Շարմազանովը:
Միաժամանակ նա ընդգծեց, որ ՀՀԿ-ն զիջումների հնարավորություն չի տեսնում երեք հիմնական կետի շուրջ՝ Լեռնային Ղարաբաղը չի կարող անկախ լինել Ադրբեջանի կազմում, այն պետք է ունենա Հայաստանի հետ ընդհանուր ցամաքային սահման, ինչպես նաև պետք է պահպանվեն Ղարաբաղի անվտանգության երաշխիքները:
«Մնացած բոլոր հարցերը կարող են քննարկման առարկա լինել», - ասաց խմբակցության քարտուղարը:
Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:
Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրեցին նրան, որ վերացավ հսկողությունը ոչ միայն Լեռնային Ղարաբաղում, այլև հարակից յոթ շրջանում:
1994թ. մայիսի 12-ին զինադադարի վերաբերյալ կնքված եռակողմ համաձայնագրից հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ մահացավ շուրջ 25-30 հազար մարդ, և մոտ մեկ միլիոնն ստիպված լքեց բնօրրանը:
Հրադադարի ռեժիմ հաստատելու վերաբերյալ համաձայնագիրը մինչ այսօր ուժի մեջ է: 1992 թվայանից ի վեր հակամարտության խաղաղ կարգավորման ուղղությամբ բանակցություներ են տարվում ԵԱՀԿ Մինսկի խմբի շրջանակներում, որոնց համանախագահներն են ԱՄՆ-ն, Ռուսաստանը և Ֆրանսիան:-0-
