ԵՐԵՎԱՆ, 22 սեպտեմբերի. /Նովոստի-Արմենիա/. Հայ ազգային կոնգրեսն (ՀԱԿ) ավելի է կորցնում իր վարկանիշը, կարծում է Հայաստանի Հանրապետական Կուսակցության խորհրդարանական խմբակցության քարտուղար Էդուարդ Շարմազանովը։
«Երևանի ավագանու խորհրդի ընտրությունները ցույց տվեցին ՀԱԿ-ի իրական վարկանիշը»,- երեքշաբթի ասաց նա «Նովոստի» միջազգային մամուլի կենտրոնում։
Երևանում մայիսի 31-ին անցկացվեցին Ավագանու խորհրդի առաջին ընտրությունները։ Խորհուրդը կազմված է 65 անդամից։ Գագիկ Բեգլարյանն ինքնաբերաբար քաղաքապետ դարձավ, քանի որ Հայաստանի Հանրապետական կուսակցությունը, որի ցուցակը գլխավորում էր նա, բացարձակ մեծամասնություն ստացավ Խորհրդում։ Հայաստանի Հանրապետական կուսակցությունը 35 մանդատ ստացավ Ավագանու խորհրդում, «Բարգավաճ Հայաստանը»՝ 17 մանդատ, իսկ ընդդիմադիր Հայ ազգային կոնգրեսը՝ 13 մանդատ։ Սակայն ՀԱԿ ներկայացուցիչները հրաժարվեցին իրենց մանդատներից։
Խոսելով Երևանում ընդդիմության հանրահավաքների վերսկսման մասին՝ Շարմազանովն ասաց, որ դա վկայում է, որ Կոնգրեսը ցանկանում է մինչև 2012 թվականի ընտրություններն ինչ-որ կերպ պահպանել առկա բողոքող ընտրազանգվածը։
Ամառային ընդմիջումից հետո արմատական ընդդիմության առաջին հանրահավաքը կայացել է Երևանում սեպտեմբերի 18-ին։
Հայ ազգային կոնգրեսը ստեղծվել է օգոստոսի մեկին Հայաստանի առաջին նախագահ Լևոն Տեր-Պետրոսյանին սատարող 16 քաղաքական կուսակցությունների և հասարակական կազմակերպությունների ջանքերով։ -0-
