Դասական երաժշտության «Վերադարձի» փառատոնի բացումը տեղի կունենա սեպտեմբերի 22-ին Երևանում, ուրբաթ «Նովոստի» միջազգային մամուլի կենտրոնում տեղի ունեցած մամուլի ասուլիսի ժամանակ տեղեկացրեց փառատոնի հիմնադիր, «Արվեստների թանգարան» մշակութային հիմնադրամի նախագահ Մարիամ Շահինյանը:
«Արդեն երրորդ տարին Երևանում ՀՀ նախագահի տիկին Ռիտա Սարգսյանի բարձր հովանու ներքո անցկացվում է ավանդական դարձած դասական երաժշտության «Վերադարձի» փառատոնը», - ասաց նա:
Այս տարի փառատոնի շրջանակներում՝ սեպտեմբերի 22-ից հոկտեմբերի 24-ը տեղի կունենան վեց համերգներ՝ ողջ աշխարհի լավագույն երաժիշտների և վոկալիստների մասնակցությամբ:
Ինչպես նշեց Շահինյանը՝ այս տարի Կոմիտասի անվան կամերային երաժշտության տանը կայանալիք փառատոնի բացմանը կմասնակցեն մեր հայրենակցուհին՝ աշխարհահռչակ մեցցո-սոպրանո (Շվեյցարիա) Ջուլիետ Գալստյանը, ինչպես նաև կլավեսինիստ Միխայիլ Բալյանը (Գերմանիա) և դիրիժոր Արամ Թալալյանը:
Ինչպես նշեց Շահինյանը՝ հաշի առնելով փառատոնի համերգացանկի լայն ձևաչափը՝ հոկտեմբերի 6-ին տեղի կունենա համերգ՝ «Հայաստան-Բուլղարիա. երաժշտական կամուրջներ» խորագրի ներքո, որի ընթացքում կներկայացվի երկու երկրների երաժշտությունը:
«Պատահական չէ փառատոնի վերնագրի ընտրությունը՝ «Վերադարձի», քանի որ այն պարունակում է ինքնատիպ ուղերձ՝ ուղղված Հայաստանի սահմաններից դուրս բնակվող երաժիշտներին, վոկալիստներին, որպեսզի նրանք գան հայրենիք և ներգրավվեն Հայաստանի երաժշտական կյանքում», - նշեց փառատոնի համահիմնադիր Գարիկ Նազարյանը:
Նրա կարծիքով՝ փառատոնն ակտիվորեն մասնակցում է երկրի երաժշտական կյանքին:
Փառատոնի փակման արարողությունը տեղի կունենա հոկտեմբերի 24-ին Արամ Խաչատրյանի անվան համերգասրահում, որի ընթացքում Հայաստանի պետական երիտասարդական նվագախմբի նվագակցությամբ ելույթ կունենա հայտնի դաշնակահար և դիրիժոր Վահագն Պապյանը (Իսրայել):
«Վերադարձի» փառատոնը կանցկացվի VivaCell-MTS ընկերության հովանավորությամբ:-0-
