ԵՐԵՎԱՆ, 18 սեպտեմբերի. /Նովոստի-Արմենիա/. Սինգապուրի տնտեսական հրաշքի հայր, Սինգապուրի Հանրապետության նախարար-մենթոր Լի Կվան Յուն կմասնակցի Հայաստանի ազգային մրցունակության խորհրդի 12-րդ` ընդլայնված նիստին, հաղորդում է Խորհրդի մամուլի ծառայությունը:
«Նիստը կբացվի խորհրդի նախագահ, ՀՀ վարչապետ Տիգրան Սարգսյանի ելույթով: Օրակարգում է Հայաստանի և համաշխարհային տնտեսության միտումների քննարկումը, համահայկական ցանցի ստեղծման և զարգացման նախագծի ներկայացումը», - ասվում է տեղեկատվության մեջ:
Նիստի ընթացքում կկայանա հանդիպում Սինգապուրի Հանրապետության նախարար-մենթոր Լի Կվան Յուի հետ, որին կմասնակցեն Հայաստանի մասնավոր ոլորտի և դոնոր համայնքի շուրջ 50 ներկայացուցիչներ: Միջոցառման նպատակն է քննարկել Սինգապուրի ազգային մրցունակությանն ուղղված քայլերից քաղված դասերը:
Մրցունակության հիմնադրամը Հայաստանի ազգային մրցունակության խորհրդի գործադիր մարմինն է, որը հիմնադրվել է 2008թ-ին` որպես ՀՀ կառավարության և մասնավոր ոլորտի համատեղ նախաձեռնություն: Հիմնադրամի նպատակն է խթանել հայկական աշխարհի մրցունակությունը` ապահովելով բեկումնային տնտեսական զարգացում:
Մրցունակության հիմնադրամի խորհուրդը կազմված է տասներեք անդամներից, որոնցից վեցը պետական բարձրաստիճան պաշտոնյաներ են, ևս վեցը` Հայաստանում, Ռուսաստանում, Եվրոպայում և ԱՄՆ-ում գործող երևելի հայազգի գործարարներ, իսկ տասներեքերորդ անդամը Հայաստանում միջազգային դոնոր համայնքի ներկայացուցիչ է: Խորհրդի նախագահն է ՀՀ վարչապետը:
Սեպտեմբերի 17-19-ը ՀՀ նախագահ Սերժ Սարգսյանի հրավերով եռօրյա պաշտոնական այցով Հայաստան կժամանի Սինգապուրի ավագ նախարար Լի Կուան Յուն: Այցի ընթացքում Սինգապուրի ավագ նախարար Լի Կուան Յուն հանդիպում կունենա Հայաստանի նախագահ Սերժ Սարգսյանի հետ: Սինգապուրի ավագ նախարարը կայցելի նաև Մայր Աթոռ Սուրբ Էջմիածին, ուր կհանդիպի Ամենայն Հայոց Գարեգին Բ կաթողիկոսի հետ: 0-
