Հայաստանի գլխավոր դատախազը հանձնարարականներ է տվել դատախազության վերահսկողության արդյունավետության բարձրացման ուղղությամբ
ԵՐԵՎԱՆ, 18 սեպտեմբերի. /Նովոստի-Արմենիա/. Հետաքննության և նախաքննության մարմինների աշխատանքների նկատմամբ դատախազական հսկողության, ինչպես նաև մեղադրանքի պաշտպանության, կոռուպցիոն երևույթների դրսևորումների դեմ պայքարում իրավապահ մարմինների կատարած աշխատանքների արդյունքներին ու բացթողումներին, նման երևույթների դեմ անհանդուրժողական մթնոլորտի ձևավորմանը վերաբերող հարցեր են քննարկվել նախօրեին ՀՀ գլխավոր դատախազությունում տեղի ունեցած խորհրդակցության ընթացքում։
«Նշելով, որ հանցավորության դեմ պայքարում քրեական քաղաքականության իրականացման առանցքը դատախազությունն է՝ ՀՀ գլխավոր դատախազը տվել է կոնկրետ հանձնարարականներ հետաքննության և նախաքննության օրինականության նկատմամբ դատախազական հսկողության արդյունավետությունը, ինչպես նաև աշխատանքային կարգապահությունը բարձրացնելու ուղղությամբ»,- ասվում է հաղորդագրությունում։
Բացի այդ, ինչպես նշվում է հաղորդագրությունում, կարևորելով աշխատանքային և գործադիր կարգապահությունն իրավապահ մարմինների համակարգում՝ դատախազը նշել է նաև, որ դատախազական գործառույթները պատշաճ չիրականացրած յուրաքանչյուր դատախազ կենթարկվի պատասխանատվության՝ գործող օրենսդրությամբ սահմանված կարգով:
Խորհրդակցությանը հրավիրվել և մասնակցում էին ՀՀ դատախազության կառուցվածքային և տարածքային ստորաբաժանումները ղեկավարող դատախազները։ -0-
