ՀՀ պաշտպանության նախարարը Բելառուսում պատվավոր հյուրի կարգավիճակով կմասնակցի ՀԱՊԿ համատեղ համալիր զորավարժությունների երկրորդ փուլին

Բելառուսի Հանրապետության պաշտպանության նախարար, գեներալ-գնդապետ Լ.Մալցևի հրավերով ՀՀ պաշտպանության նախարար Ս.Օհանյանը` պատվավոր հյուրի կարգավիճակով,  սեպտեմբերի 29-ին կմասնակցի ՀԱՊԿ համատեղ համալիր զորավարժության ակտիվ փուլին, հինգշաբթի «Նովոստի-Արմենիա» գործակալությանը հայտնեց հանրապետության պաշտպանության նախարարի մամուլի քարտուղար Սեյրան Շահսուվարյանը:

Հաղորդագրության համաձայն՝ նախարարին կուղեկցեն ՀՀ ՊՆ ՊՔ վարչության պետ, գնդապետ Դավիթ Տոնոյանը և ՀՀ պաշտպանության նախարարի օգնական, կապիտան Ա.Առաքելյանը:

Զորավարժությունների երկրորդ փուլը կանցկացվի Բելառուսի Հանրապետությունում` Բելառուսի և Ռուսաստանի Դաշնության զինված ուժերի օպերատիվ ռազմավարական «Զապադ-2009» զորավարժության տեսքով, ս.թ. սեպտեմբերի 26-ից 29-ը` «Հավաքական անվտանգության Արևելա-Եվրոպական տարածաշրջանում ՀԱՊԿ անդամ պետությունների զինված ուժերի ռազմական ստորաբաժանումների կիրառման կազմակերպում» թեմայով:

«ՀՀ պաշտպանության նախարարությունը չի պլանավորում ՀՀ ԶՈՒ ստորաբաժանումների մասնակցությունը զորավարժության երկրորդ փուլին, սակայն 4 հոգուց բաղկացած ՀՀ ԶՈՒ օպերատիվ խումբը` ՀՀ ԶՈՒ ԳՇ ռազմավարական պլանավորման վարչության պետ, գնդապետ Գ.Տավարածյանի գլխավորությամբ կմասնակցի նշված զորավարժությանը»,- ասվում է հաղորդագրության մեջ:

2009թ. ՀԱՊԿ շրջանակներում նախատեսված է առաջին համատեղ համալիր զորավարժության անցկացում` անդամ պետությունների օպերատիվ խմբերի, ՀԱՊԿ քարտուղարության, միացյալ շտաբի, զինվորական ստորաբաժանումների և օպերատիվ արձագանքման օպերատիվ ուժերի (ՕԱՀՈՒ) հատուկ նշանակության ուժերի ստորաբաժանումների մասնակցությամբ, որը կիրականացվի երեք փուլով:

Առաջին փուլը անցկացվել է Մոսկվայում ՀԱՊԿ միացյալ շտաբի բազայի վրա` օգոստոսի 25-28-ը, որտեղ ՀՀ ՊՆ-ից մասնակցել է 5 հոգուց բաղկացաց օպերատիվ խումբը, ինչպես նաև ներկայացուցիչներ ՀՀ ոստիկանությունից, ՀՀ արտակարգ իրավիճակների նախարարությունից և ՀՀ ազգային անվտանգության ծառայությունից` գեներալ-լեյտենանտ Մ.Սարգսյանի գլխավորությամբ:-0-