Հակերների գրոհների հետ կապված իրավիճակը կարող է ինտերնետ-ահաբեկչության հանգեցնել. Կասպերսկի
Հակերային գրոհների հարցում դեպքերի զարգացումը կարող է հանգեցնել մի իրավիճակի, որը կարելի է ինտերնետ-ահաբեկչություն անվանել, ասաց «Կասպերսկու լաբորատորիաների» գլխավոր տնօրեն Եվգենի Կասպերսկին:
«Որքան ավելի ուշ դա տեղի ունենա, այնքան ավելի լավ»,- ասաց նա չորեքշաբթի մամուլի ասուլիսի ժամանակ Երևանում:
Անդրադառնալով հակերների գրոհների մասին թեմային, որոնց վերջերս ենթարկվել էին ՀՀ որոշ պետական կառույցների կայքեր՝ նա այդ իրավիճակը շատ վտանգավոր համարեց:
«Նման գրոհները շատ ավելի զանգվածային են դառնում, և, դժբախըաբար, Ինտերնետն այնպես է ստեղծված, որ հնարավոր է մի սցենար, երբ կարող է խնդիր առաջանալ ոչ միայն որոշ հայկական կայքերում, այլև բոլորում»,- ասաց նա:
Պատասխանելով «Նովոստի-Արմենիա» գործակալության հարցին՝ Կասպերսկին նշեց, որ Ինտերնետ անվտանգության մակարդակով Հայաստանը ոչնչով չի տարբերվում մյուս երկրներից:
«Ինտերնետն ամեն տեղ նույնն է, հակերները միջազգային են ու գողանում են հնարավոր ամեն ինչ»,- պարզաբանեց նա:
Այս առնչությամբ «Կասպերսկու լաբորատորիաների» ղեկավարը հավելեց, որ տարբեր տարածաշրջաններում տարբեր առանձնահատկություններ կան, մասնավորապես, Հարավ-Արևելյան Ասիայի երկրներում շատ են տարածված լրտեսական ծրագրերը, որոնք տեղեկատվություն են գողանում համակարգչային խաղերի մասին՝ գողացված կերպարների հետագա վերավաճառքի համար:
«Աշխարհի մյուս մասերում գողանում են բանկային տեղեկատվություն, գրավում են համակարգիչը՝ ցանցում հետագա գրոհների և սպամ ուղարկելու համար»,- ասաց նա:
Կասպերսկին հայտնեց նաև, որ Հայաստանում մեծ մասսայականություն է վայելում հատկապես «Կասպերսկու լաբորատորիաների» տնային արտադրանքը և լուծումները միջին բիզնեսի համար:
Խոսելով որոշակի դասակարգված գրոհներից պաշտպանվելու մասին` Կասպերսկին նշեց, որ այս պահին «Կասպերսկու լաբորատորիաները» չի զբաղվում նման լուծումներով:
«Բայց մենք կարող ենք խորհրդատվություն անցկացնել, մասնավորպես, ֆիլտրներ դնելու հարցում»,- հավելեց նա:
ՀՀ Էկոնոմիկայի նախարարությունը և համակարգչային անվտանգության ու հակավիրուսային ծրագրային ապահովման ոլորտի առաջատարներից «Կասպերսկու Լաբորատորիան» ստորագրել են «Անվտանգ Հայաստան» փոխըմբռնման հուշագիրը, որը թույլ կտա տեղեկատվական անվտանգության ոլորտում երկուստեք հաստատել առավել արդյունավետ համագործակցություն։
Առաջադրված նպատակներին հասնելու համար կողմերը ենթադրում են համատեղ ժամանակավոր աշխատանքային խմբեր ստեղծել տնտեսական ու տեխնիկական փոխգործակցության հարցերը դիտարկելու և տեղեկատվության պաշտպանության ոլորտում երկարատև համագործակցության համատեղ ծրագրեր մշակելու համար: -0-
