Հայկական պատվիրակությունը Ժնևում մասնակցել է «ՄԱԿ-ի համաշխարհային մոդել» առաջին սեմինարին

Հայկական բուհերի 9 ուսանողներից բաղկացած հայկական պատվիրակությունը մասնակցել է «Հազարամյակի զարգացման նպատակները. Հաղթահարենք աղքատությունը» խորագրով «ՄԱԿ-ի համաշխարհային մոդել» առաջին սեմինարին, որն անցկացվեց օգոստոսի 2-7-ը Ժնևում:

Երևանի պետական համալսարանի, Հայաստանի Ֆրանսիական համալսարանի և Ռուս-հայկական (Սլավոնական) համալսարանի ուսանողները աշխարհի ավելի քան 60 երկրների 700 երիտասարդ մասնակիցների թվում էին:

«Երիտասարդությունը միշտ առաջնահերթ դեր է խաղում ՄԱԿ-ի համար: Վստահ եմ, որ այս երիտասարդական հավաքը ղեկավարման հմտությունների զարգացման և շփման համար գերազանց հնարավորություն է դարձել, ինչը շատ կարևոր կլինի ձեր ողջ կյանքի ընթացքում»,- ասաց ՄԱԿ-ի հայկական գրասենյակի մշտական համակարգող Կոնսուելո Վիդալը:

Նրա խոսքերով՝ խաղաղապահ գործունեությունից զատ ՄԱԿ-ը մեծ տեղ է տալիս զարգացման նպատակներին, մասնավորապես, հազարամյակի զարգացման նպատակներին հասնելուն:

Դիմելով սեմինարի մասնակիցներին` Վիդալը նշեց, որ նրանք արդեն ունեն անհրաժեշտ հմտություններ և փորձ ու կարող են նպաստել Հայաստանի բարգավաճմանը:  

Իր հերթին հայկական պատվիրակության ղեկավար Արամ Ոսկանյանը հայտնեց, որ այցի ընթացքում պատվիրակները մանրամասն ծանոթացել են ՄԱԿ-ի իրական գործունեության հետ, նրանց բացառիկ հնարավորություն է ընձեռվել շփվել կազմակերպության պաշտոնատար անձանց հետ:

ՄԱԿ-ի սեմինար-մոդելները արված են ՄԱԿ-ի որևէ մարմնի օրինակով (Գլխավոր ասամբլեայի՝ իր հիմնական բաղկացուցիչներով կամ Անվտանգության խորհրդի): Ամեն տարի աշխարհի ավելի քան 70 երկրների ավելի քան կես միլիոն երիտասարդներ մասնակցում են ՄԱԿ-ի մոդելներին:  

Միջոցառման կազմակերպիչներն էին ՄԱԿ-ի Հանրային տեղեկատվության դեպարտամենտի կենտրոնական գրասենյակը՝ ՄԱԿ-ի Համաշխարհային ընկերակցությունների դաշնության հետ համատեղ: «ՄԱԿ-ի համաշխարհային մոդելին» հայկական պատվիրակության մասնակցությանը աջակցեցին ՀՀ նախագահը, ՀՀ կառավարությանը կից Քաղաքացիական ավիացիայի գլխավոր վարչությունը, Հայաստանում ՄԱԿ-ի Հանրային կապերի դեպարտամենտը և ՄԱԿ-ի հայկական ընկերակցությունը:-0-