«Ժառանգություն» կուսակցությունը կառավարությունից պահանջում է հայ-թուրքական արձանագրությունների հանրաքվե անցկացնել՝ զուգակցված նախագահի վստահության հարցով

«Ժառանգություն» կուսակցության վարչության նախագահ Արմեն Մարտիրոսյանը և խորհրդարանական խմբակցության ղեկավար Ստյոպա Սաֆարյանը կուսակցության ու խմբակցության անունից պաշտոնական գրություն են ուղարկել Հայաստանի վարչապետ Տիգրան Սարգսյանին, չորեքշաբթի հայտնում է կուսակցության մամուլի ծառայությունը:

«Դեռևս սեպտեմբերի 3-ին «Ժառանգություն» կուսակցությունը հանդես էր եկել  Հայաստանի և Թուրքիայի արտաքին գործերի նախարարությունների նախաստորագրած երկու արձանագրություններին նվիրված հայտարարությամբ: Ի թիվս հայ-թուրքական հարաբերությունների վերաբերյալ պետական-հասարակական-քաղաքական վերաբերմունքի ու տեսակետների վերհանմանն ուղղված և մեր կողմից նպատակահարմար համարվող 10 քայլերի, մենք նշել էինք, որ մինչև արձանագրությունների վերջնական ստորագրումն ու վավերացումը, առաջիկա մեկ ամսվա ընթացքում հանրաքվեի դնել համաձայնեցված փաստաթղթերը` զուգակցված երկրի արտաքին քաղաքականության համար պատասխանատու ՀՀ նախագահի վստահության հարցով»,- ասվում է հայտարարության մեջ:

«Ժառանգության» ներկայացուցիչներն իրենց հայտարարության մեջ նշում են, որ համաձայն «Հանրաքվեի մասին» ՀՀ օրենքում կատարված փոփոխությունների և լրացումների` իբրև ժողովրդի կողմից անմիջականորեն իշխանության իրականացման մեխանիզմ հանրաքվեի կարող են դրվել նաև պետական կյանքի կարևորագույն հարցեր: Պետական կյանքի կարևորագույն հարցերի վերաբերյալ հասարակական կարծիքի բացահայտմանն ուղղված հանրաքվե անցկացնելու նախաձեռնության իրավունք ունի կառավարությունը, ով հանրաքվե անցկացնելու անհրաժեշտությունը և հանրաքվեի դրվող հարցերը նախապես քննարկում է ՀՀ նախագահի հետ:

«Ժառանգություն» կուսակցության և համանուն խմբակցության անունից դիմում ենք Ձեզ` իրացնելու ՀՀ Սահմանադրությամբ, «Հանրաքվեի մասին» ՀՀ օրենքով Ձեզ վերապահված պատասախանատվությունն ու իրավունքը, այն է` նախաձեռնել և առաջիկա մեկ ամսվա ընթացքում կազմակերպել համաձայնեցված ու նախաստորագրված փաստաթղթերի վերաբերյալ հասարակական կարծիքի բացահայտմանն ուղղված հանրաքվե, որը զուգակցված կլինի երկրի արտաքին քաղաքականության համար պատասխանատու ՀՀ նախագահի վստահության հարցով»,- ասվում է վարչապետին ուղղված նամակում:

«Ժառանգությունը» նաև տեղեկացրել է, որ խմբակցության պատգամավորների և կուսակցության կողմից ՀՀ վարչապետ Տիգրան Սարգսյանին հղված նամակը պաշտոնական գրություն է, որը «ԱԺ կանոնակարգ օրենքով» սահմանված կարգով 10-օրյա ժամկետում պահանջում է գրավոր պատասխան: -0-