Հայաստանի նախագահը Պատվո Շքանշան է հանձնել Միշել Լեգրանին
Հայաստանի նախագահ Սերժ Սարգսյանը երեքշաբթի Հայաստանի Պատվո Շքանշան է հանձնել աշխարհահռչակ կոմպոզիտոր, դաշնակահար Միշել Լեգրանին, «Նովոստի-Արմենիա» գործակալությանը հայտնեցին երկրի ղեկավարի մամուլի ծառայությունից։
Պատվո շքանշանով Լեգրանին պարգևատրելու մասին հրամանագիրը նախագահ Սարգսյանը ստորագրել է նախօրեին: Պատվո Շքանշանը հանձնվում է Հայաստանի Հանրապետության պետական և ազգային շահերի պաշտպանության, անկախության, ժողովրդավարության, ՀՀ հետ բարեկամության հաստատման, ամրապնդման և զարգացման գործում առանձնահատուկ վաստակի, ինչպես նաև ժողովուրդների միջև խաղաղության հաստատման գործում ունեցած էական ներդրումների համար։
«Ինձ համար մեծ պատիվ է հանդիպել Ձեզ` մեր ժողովրդի արժանավոր զավակներից մեկին, ով մեծ ավանդ ունի 20-րդ դարի երկրորդ կեսի համաշխարհային երաժշտության մեջ: Ձեզ նման վառ անհատականությունների շնորհիվ է նաև մեր ժողովուրդն առավել ճանաչելի դառնում աշխարհին: Մեր ժողովուրդը սիրում և հպարտանում է Ձեզանով»,- ասաց Հայաստանի նախագահը։
Անվանի կոմպոզիտորը նախագահին պատմեց Հայաստան կատարած այցելությունից իր տպավորությունների մասին: «Ամեն անգամ, երբ առիթ է լինում այցելել Հայաստան, կարծեք, վերադառնում եմ իմ ազգային ակունքներին: Ինձ համար հոգեհարազատ է և իմ արյան մեջ հոսում է հայկական երաժշտությունը»,- նշեց Միշել Լեգրանը:
Նախագահ Սարգսյանն ու Միշել Լեգրանը մտքեր են փոխանակել նաև համահայկական նշանակության խնդիրների մասին: -0-
