Հանրաճանաչ կոմպոզիտոր Միշել Լեգրանը երևանյան համերգից առաջ ակտիվորեն փորձեր է անցկացնում հայկական նվագախմբի հետ
Համաշխարհային ճանաչում ունեցող կոմպոզիտոր, դիրիժոր, մեներգիչ և ջազմեն, «Շերբուրի հովանոցներ» հայտնի ֆիլմի երաժշտության հեղինակ Միշել Լեգրանը Երևանում կայանալիք համերգից առաջ ակտիվորեն փորձեր է անցկացնում Հայաստանի պետական երիտասարդական նվագախմբի հետ։
Լեգրանի բացառիկ համերգը տեղի կունենա Երևանում սեպտեմբերի 15-ին:Սա Լեգրանի առաջին մենահամերգն է Երևանում, մինչ այդ նա այցելել է Հայաստան, սակայն ելույթ է ունեցել հավաքական համերգներում, այդ թվում նաև Շառլ Ազնավուրի հետ: Լեգրանի համերգին կմասնակցի նաև Միշել Լեգրանի կինը՝ հանրահռչակ տավղահարուհի Կատրին Միշելը և կոմպոզիտորի քույրը՝ հիանալի երգչուհի, հիասքանչ սոպրանո Քրիստիան Լեգրանը, որը The Swingle Singers հայտնի վոկալ խմբի նախկին մենակատարն է: Համերգը տեղի կունենա Հայաստանի պետական երիտասարդական նվագախմբի ուղեկցությամբ՝ Սերգեյ Սմբատյանի գլխավորությամբ:
Ինչպես երկուշաբթի Երևանում հայտնեց Լեգրանը, փորձերը հայկական նվագախմբի հետ անցկացվում են արդեն երկու օր՝ հնգական ժամ տևողությամբ, ևս մեկ փորձ նախատեսված է երեքշաբթի։
Ինչպես նշեց մաեստրոն, համերգի ընթացքում կհնչեն իր ստեղծագործությունները մյուզիքլներից և ֆիլմերից։
«Ես նվագելու եմ, երգելու եմ, խմբավարելու եմ, ինձ հետ բեմում ելույթ կունենա իմ կինը՝ տավղահարուհին, ինչպես նաև քույրս, ով կերգի մի քանի ստեղծագործություններ, ինչպես նաև կոնտրաբասիստ-ջազմենը, ով նույնպես ինձ հետ Ֆրանսիայից է ժամանել»,- ասաց Լեգրանը՝ նշելով, որ հայկական ստեղծագործություններ համերգի ընթացքում չեն հնչելու։
Ինչ վերաբերում է համագործակցությանը հայ կոմպոզիտորների և կատարողների հետ, ապա ինչպես նշեց մաեստրոն, առաջարկներ Հայաստանում աշխատելու և համատեղ ծրագրեր իրականացնելու հայ կոմպոզիտորների և կատարողների հետ չկան, ինչպես չկան նաև նման մտադրություններ։
Խոսելով սեփական ակնկալիքների մասին առաջիկա համերգից՝ Լեգրանը նշեց, որ նա միշտ իր երաժշտությունն է նվագում և այդ պատճառով «սպասելիքներն այնպիսին են, ինչպես իմ երաժշտությունից, որը ես կատարում եմ»։
Իր հերթին հայտնի հայ ջազմեն Լևոն Մալխասյանը նշեց, որ երկու տարի առաջ, երբ Լեգրանը ժամանել էր Հայաստան ֆրանսահայ հայտնի շանսոնյե Շարլ Ազնավուրի հետ, այցելեց «Մալխաս» ակումբը, և կատարվեց ջեմ-սեյշն, որը հիանալի տպավորություն թողեց։
Իր կողմից ՎՏԲ Հայաստան Բանկ ՓԲԸ գլխավոր տնօրեն-տնօրինության նախագահ Վալերի Օվսյաննիկովն, ով համերգի հովանավորներից է, գոհունակություն հայտնեց այն կապակցությամբ, որ Լեգրանը ելույթ կունենա Հայաստանում։
«Ես ուրախ եմ, որ մաեստրոն ելույթ է ունենում, և մենք շատ ջանք ենք գործադրել՝ այդ մեծ մարդուն Երևան հրավիրելու համար»,- ասաց բանկի ղեկավարը։
Երևանում Լեգրանի համերգի գլխավոր հովանավորներն են ՎՏԲ-Հայաստան Բանկը, «Ռոսգոսստրախ-Արմենիա» ԱՓԲԸ-ն, «ԱրմենՏել» ՓԲԸ-ն, «Արմավիա» ՍՊԸ-ն և Երևանի կոնյակի գործարանը:
Գործընկերներն են «Նովոստի-Արմենիա» միջազգային լրատվության գործակալությունը, Հայաստանի հանրային հեռուստառադիոընկերությունը, «Բալ» իվենթ-ընկերությունը, ինչպես նաև «Գոլդեն Թուլիփ» հյուրանոցը: Համերգի կազմակերպիչներն են City Lights Productions-ը (GB, London) և Malkhas Jazz Club-ը՝ ՀՀ մշակույթի նախարարության և Ռուսաստանում Հայաստանի դեսպանատան աջակցությամբ:
Ֆրանսահայ կոմպոզիտոր, դաշնակահար և գործիքավորող Միշել Լեգրանը երեք անգամ արժանացել է «Օսկարի»՝ «Երաժշտություն և կինո» անվանակարգում, տասներկու անգամ՝ Սեզար եվրոպական մրցանակի և հինգ անգամ դարձել է «Գրեմի» հեղինակավոր երաժշտական մրցանակի դափնեկիր: Իսկ ստեղծագործական ողջ կյանքի ընթացքում մաեստրոն երաժշտություն է գրել 200 ֆիլմի համար և ձայնագրել ավելի քան 100 ալբոմ, այդ թվում նաև ջազային և սիմֆոնիկ ժանրերում:
Աստղերի ցանկը, ում հետ աշխատել է Լեգրանը, հիրավի փայլուն է՝ Ֆրենկ Սինատրա և Էդիտ Պիաֆ, Շառլ Ազնավուր և Լայզա Մինելի, Օսկար Պիտերսոն և Բարբարա Սթրեյզանդ, Մայլզ Դևիս և Դայանա Ռոսս, Սթեն Գեթց և Ստեֆան Գրափելի, Ռեյ Չարլզ և Մորիս Շևալյե, Քաթրին Դենյով և Մարի Լաֆորե:-0-
