Ուլյանովսկի մարզի պատվիրակությունը երեքշաբթի ժամանում է Հայաստան
Ուլյանովսկի մարզի պատվիրակությունը՝ մարզի ղեկավար Սերգեյ Մորոզովի գլխավորությամբ, սեպտեմբերի 15-17-ը կայցելի Հայաստան, «Նովոստի-Արմենիա» գործակալությանը տեղեկացրեցին Հայաստանում Ռուսաստանի դեսպանատան մամուլի ծառայությունից:
Տեղեկատվության համաձայն՝ ՀՀ Շիրակի մարզպետ Լիդա Նանյանի հրավերով Հայաստան ժամանող պատվիրակության կազմում են Ուլյանովսկի մարզի ղեկավարության անդամները, Ուլյանովսկի տեխնոպարկի, առևտրաարդյունաբերական պալատի, ինչպես նաև մարզի հայկական համայնքի ներկայացուցիչները:
Այցի շրջանակներում ծրագրված են հանդիպումներ ՀՀ նախագահ Սերժ Սարգսյանի, ՀՀ վարչապետ Տիգրան Սարգսյանի, Շիրակի մարզպետ Լիդա Նանյանի, Արդյունաբերողների և ձեռներեցների միության, Առևտրաարդյունաբերական պալատի ներկայացուցիչների, ինչպես նաև Ուլյանովսկի մարզի հետ համագործակցությամբ շահագրգիռ ձեռնարկությունների ղեկավարների հետ:
Այցի ընթացքում տեղի կունենա նաև Ուլյանովսկի մարզի տնտեսական և ներդրումային ներուժի շնորհանդեսը:
Պատվիրակության անդամները կայցելեն Գյումրիի երկրաշարժի զոհերի հուշահամալիր և աղետի ենթարկված Իլ-76 ինքնաթիռի զոհերի հուշահամիլիր, որում գտնվում էին Ուլյանովսկի մարզի փրկարարները:
Ենթադրվում է, որ պատվիրակության՝ Հայաստանում գտնվելու ժամանակ, 2009 թ.-ի մայիսի 29-ին Ուլյանովսկի մարզ Շիրակի մարզպետ Նանյանի կատարած այցի ընթացքում ստորագրված Ուլյանովսկի և Շիրակի մարզերի միջև մտադրությունների մասին արձանագրության համաձայն՝ կնքվի երկու մարզերի միջև առևտրատնտեսական, գիտատեխնիկական և մշակութային համագործակցության մասին համաձայնագիր:
Բացի այդ՝ կողմերը ստորագրման են պատրաստում Ուլյանովսկի քաղաքացիական ավիացիայի բարձրագույն ավիացիոն ուսումնարանի բազայի հիման վրա Հայաստանի կադրերի և ավիացիոն մասնագետների պատրատման մասին մտադրությունների և Ուլյանովսկ-Երևան չարտերային չվերթի բացման վերաբերյալ արձանագրությունը:-0-
