Ամենաերիտասարդ հայ գրոսմայստերը հասել է դրված նպատակին՝ դառնալով Շախմատի եվրոպայի չեմպիոն

Ամենաերիտասարդ հայ գրոսմայստեր Սամվել Տեր-Սահակյանը հասել է դրված նպատակին՝ դառնալով Իտալիայի Ֆերմո քաղաքում ավարտված Շախմատի եվրոպայի մանկապատանեկան մրցաշարի չեմպիոն:

«Մինչ մրցաշարի մեկնարկը բոլոր շախմատիստները, այդ թվում նաև ես, իրենց առջև նպատակ էին դնում՝ անպայման ցուցադրել լավագույն խաղ ու հաղթել: Ինձ վերաբերող բոլոր սպասումները լիովին արդարացան», - շաբաթ օրը լրագրողներին ասաց Տեր-Սահակյանը:

Նրա խոսքերով՝ մրցաշարին տարած հաղթանակը նրան վստահություն ներշնչեց և ազդակ տվեց՝ շարունակել հաղթական էստաֆետը նաև շախմատի այլ՝ ավելի մեծ մրցաշարերում, մասնավորապես, Ստամբուլում սեպտեմբերի 24-ից հոկտեմբերի 4-ը կայանալիք մինչև 18 տարեկանների շախմատի 2009 թ.-ի օլիմպիադայում:

Եվրոպայի 2009 թ.-ի մանկապատանեկան մրցաշարը մինչև 10,12,14,16 և 18 տարեկան տարիքայի խմբերում անցկացվել է Իտալիայի Ֆերմո քաղաքում օգոստոսի 31-ից սեպտեմբերի 9-ը:

Մայրցամաքի գլխավոր մրցանակների համար պայքարելու նպատակով Ֆերմո քաղաք էին ժամանել 46 երկրները ներկայացնող շախմատիստներ:

Քսաներեք հոգուց բաղկացած հայ շախմատիստների պատվիրակությունը մասնակցել է Ֆերմոյի մրցաշարին տարիքային տարբեր կատեգորիաներում: Տեր-Սահակյանը դարձել է Եվրոպայի չեմպիոն մինչև 18 տարեկանների շրջանում՝ հավաքելով 9 հնարավորից 7-ը, հայ շախմատիստներ Վահե Բաղդասարյանն ու Ռոբերտ Աղասարյանը (մինչև 16 տարեկանների տարիքային խումբ) 6,5 միավորով կիսել են 4-9-րդ տեղերը, իսկ Միքայել Մկրտչյանը (մինչև 10 տարեկանների տարիքային խումբ) 6,5 միավորով կիսել է 5-10-րդ տեղերը:-0-