ՀՀ վարչապետը հանդիպել է հայտնի բրազիլացի դերասան Ստեփան Ներսեսյանի հետ

ՀՀ վարչապետ Տիգրան Սարգսյանը ուրբաթ հանդիպել է հայտնի բրազիլացի դերասան և քաղաքական գործիչ Ստեփան Ներսեսյանի հետ, ով առաջին անգամ ճանաչողական այցով գտնվում է պատմական հայրենիքում, հաղորդում է ՀՀ կառավարության մամուլի ծառայությունը:

«Ողջունելով հյուրին՝ Տիգրան Սարգսյանը բարձր է գնահատել արվեստագետի և քաղաքական գործչի հայանպաստ գործունեությունը և նշել է, որ Հայաստանը կարևորում է Բրազիլիայի հետ համագործակցության զարգացումը, որում իր նշանակալի դերն ունի հայկական համայնքը», - ասվում է տեղեակտվության մեջ:

Ներսեսյանն իր հերթին համոզմունք է հայտել, որ այցելությունը նոր լիցք կհաղորդի իրեն` հայանպաստ աշխատանքները շարունակելու գործում:

«Զրուցակիցներն անդրադարձել են Հայրենիք-Սփյուռք կապերի ամրապնդմանն ու խորացմանը, Հայաստանի և Բրազիլիայի միջև արվեստի ու մշակույթի ոլորտում համագործակցությանը», - ասվում է տեղեկատվության մեջ:

Հայազգի դերասանին ուղեկցել է նաև Հայաստանում Բրազիլիայի դեսպան Մարսելա Մարիա Նիկոդեմոսը:-0-