ՀՀ նախագահը Աշոտ Քոչարյանին Լիբանանում ՀՀ դեսպան է նշանակել

ՀՀ նախագահ Սերժ Սարգսյանը հինգշաբթի հրամանագիր է ստորագրել Աշոտ Քոչարյանին Հնդկաստանի Հանրապետությունում ՀՀ արտակարգ և լիազոր դեսպանի պարտականություններից ազատելու մասին:

Ինչպես հինգշաբթի «Նովոստի-Արմենիա» գործակալությանը տեղեկացրեցին ՀՀ նախագահի մամուլի ծառայությունից, նույն հրամանագրով ՀՀ նախագահը Քոչարյանին նշանակել է Լիբանանի Հանրապետությունում ՀՀ արտակարգ և լիազոր դեսպան (նստավայրը՝ Բեյրութ):

Աշոտ Քոչարյանը ծնվել է 1957 թ.-ի հունիսի 8-ին Երևանում: Նա հայ քաղաքական և պետական գործիչ է, դիվանագետ:

Ավարտել է Բրյուսովի անվան օտար լեզուների ինստիտուտի անգլերեն լեզի ֆակուլտետը, ՀՀ գիտությունների ազգային ակադեմիայի փիլիսոփայության և իրավունքի ինստիտուտի ասպիրանտուրան: Քոչարյանը պաշտպանել է պատերազմի և խաղաղության հարցերին նվիրված թեկնածուական դիսերտացիա: Դիվանագետների համար հատուկ դասընթացներ է անցել Նիդեռլանդների  «CLINGENDAL» միջազգային հարաբերությունների ինստիտուտում: Աշոտ Քոչարյանն ավարտել է Վիեննայի դիվանագիտական ակադեմիան, ինչպես նաև Ֆինլանդիայի ակադեմիական համալսարանի մարդու իրավունքների ինստիտուտի բարձրագույն դասընթացները:

Տարբեր տարիների Քոչարյանը զբաղեցրել է հայկական դպրոցներից մեկի փոխտնօրենի պաշտոնը, ՀՀ ԳԱԱ փիլիսոփայության և իրավունքի ինստիտուտի գիտքարտուղարի պաշտոնը:

Աշոտ Քոչարյանը զբաղեցրել է նաև ՀՀ արտգործնախարարության եվրոպական երկրների վարչության առաջին քարտուղարի պաշտոնը, Հայաստանում ՄԱԿ-ի բաժնի ղեկավարի, ինչպես նաև Ավստրիայի դեսպանատան առաջին քարտուղարի պաշտոնները: Քոչարյանը նաև ղեկավարել է ՀՀ արտգործնախարարության հումանիտար հարցերի և մարդու իրավունքների բաժինը:

1999-2002 թթ.-ին Քոչարյանն զբաղեցրել է ՀՀ արտգործնախարարության միջազգային հարաբերությունների վարչության խորհրդականի պաշտոնը, իսկ 2002-2003 թթ.-ին՝ նույն վարչության պետի պաշտոնը: 2003-2005 թթ.-ին զբաղեցրել է ՀՀ նախագահի մամուլի քարտուղարի պաշտոնը:

Իսկ 2005 թ.-ից զբաղեցրել է Հնդկաստանում, Շրի-Լանկայում, Նեպալում և Ինդոնեզիայում ՀՀ արտակարգ և լիազոր դեսպանի պաշտոնը:-0-