Տնտեսական անկումը Հայաստանում 2009 թ.-ի արդյունքներով 10-15 տոկոս կկազմի, իսկ սղաճը` 3 տոկոս. ԱՄՀ

Տնտեսական անկումը Հայաստանում 2009 թ.-ի արդյունքներով, ԱՄՀ նախնական կանխատեսումներով, 10-15 տոկոս կկազմի, իսկ սղաճը` 3 տոկոս, չորեքշաբթի լրագրողներին ասաց Հայաստանում ԱՄՀ մշտական ներկայացուցիչ Նինկե Օմեսը (Nienke Oomes):

Տնտեսական անկումը 2009 թ.-ի հունվար-հունիսին 16,3 տոկոս է կազմել: Օգոստոսին, հուլիսի համեմատ, գրանցվել է 0,4 տոկոս գնանկում: Միևնույն ժամանակ ընթացիկ տարվա օգոստոսին, 2008 թ.-ի դեկտեմբերի համեմատ, սպառողական գների ցուցիչը 102, 0 տոկոս է կազմել:

Ինչպես նշեց Հայաստանում հիմնադրամի ներկայացուցիչը, ԱՄՀ վերջին կանխատեսման համաձայն` հայկական տնտեսության անկումը մինչև 2009 թ.-ի վերջը 9,5 տոկոս կկազմի, սակայն տվյալ պահին այդ ցուցանիշը գտնվում է վերանայման գործընթացում:

Նրա խոսքերով` այս առնչությամբ Հայաստանում է գտնվում ԱՄՀ առաքելությունը Վաշինգտոնից, որը կքննարկի իրավիճակը կառավարության, Կենտրոնական բանկի, մասնավոր հատվածի հետ, ինչից հետո կանխատեսումները կհստակեցվեն:  

«Սակայն, նախնական տվյալներով, անկումը 2009 թ.-ի արդյունքներով 10-15  տոկոս կկազմի, իսկ միջին տարեկան սղաճը` 3 տոկոս, ինչը բավականին ցածր ցուցանիշ է այլ երկրների համեմատ»,- ասաց Օմեսը:

Ընդ որում Հայաստանում ԱՄՀ առաքելության ղեկավարն ընդգծեց, որ տնտեսության ընդհանուր կրճատումը տարվա արդյունքներով ավելի ցածր կլինի, քան առաջին կիսամյակում, քանի որ կրճատումն սկսվել է 2008 թ.-ի վերջին եռամսյակում, ինչի կապակցությամբ էլ տարեկան աճն արդեն ավելի լավատեսական տեսք կունենա:

Նա հավելեց նաև, որ ԱՄՀ-ն համաձայն է կառավարության կանխատեսման հետ՝ 2010 թ.-ին ՀՆԱ ոչ մեծ աճի կապակցությամբ, որը «դրական, բայց շատ ցածր կլինի»:

ՀՀ Ֆինանսների նախարարության գնահատականներով՝ տնտեսական անկումը երկրում 2009 թ.-ի արդյունքներով 10-15 տոկոսի սահմաններում կլինի: Միևնույն ժամանակ ՀԲ-ն կանխատեսում է, որ տնտեսական անկումը Հայաստանում 2009 թ.-ին 12-14 տոկոս կկազմի, իսկ սղաճը` 6 տոկոսի սահմաններում կգտնվի:   

Ընդ որում, համաձայն պետբյուջեի, ՀՆԱ աճը 2009 թ.-ին ծրագրված է 9,2 տոկոսի մակարդակում, իսկ սղաճը հաստատված է 4 տոկոսի սահմաններում (±1,5%): -0-