Իրավապահ մարմինները թույլ չեն տա Հայաստանը վերածել թմրամիջոցների տեղափոխման տարանցիկ երկրի. գլխավոր դատախազ
ՀՀ իրավապահ մարմինները թույլ չեն տա Հայաստանը վերածել թմրամիջոցների տեղափոխման տարանցիկ երկրի, ասաց ՀՀ գլխավոր դատախազ Աղվան Հովսեփյանը Հայաստանում Իրանի Իսլամական Հանրապետության արտակարգ և լիազոր դեսպան Սեյեդ Ալի Սաղաիանիի հետ հանդիպման ընթացքում։
«Հայաստանի իրավապահ մարմիններն ունեն համապատասխան ներուժ և վճռականություն՝ թույլ չտալու Հայաստանը վերածել թմրամիջոցների տեղափոխման տարանցիկ երկրի»,- մեջբերեցին Հովսեփյանի խոսքերը գլխավոր դատախազության մամուլի ծառայությունից։
«Գլխավոր դատախազը նշեց նաև, որ քիմիական բաղադրության թմրամիջոցներն, ըստ քրեական գործերի ուսումնասիրության, Հայաստան են ներմուծվում հիմնականում Իրանից։ Նա հույս հայտնեց, որ Իրանի իրավապահ մարմինները հետևողական կլինեն բացահայտելու ԻԻՀ տարածքից Հայաստան թմրամիջոց առաքողներին:
Հանդիպման ընթացքում ՀՀ գլխավոր դատախազը բարձր գնահատեց երկու երկրների միջև իրավական փոխօգնության և դատապարտյալների հանձնմանը վերաբերող համաձայնագրերի ստորագրման գործում դեսպանի ունեցած ներդրումը՝ հույս հայտնելով, որ դրանք կնպաստեն հանցավորության դեմ պայքարում Հայաստանի և Իրանի իրավապահ մարմինների համագործակցության սերտացմանը:
Կողմերը կարևորեցին երկու երկրների քաղաքացիների իրազեկումն ու ծանոթացումը միմյանց օրենսդրական դաշտերի առանձնահատկություններին ՝ ընդգծելով հատկապես մաքսանենգ ճանապարհով ապրանքների տեղափոխման և հատկապես թմրամիջոցների ապօրինի շրջանառության դեմ պայքարում իրավապահ մարմինների առավել սերտ համագործակցության կարևորությունը:
Իր հերթին շնորհակալություն հայտնելով համագործակցության համար` Իրանի դեսպանը ՀՀ գլխավոր դատախազին հրավիրեց Իրան։
Նա ողջունեց նաև համագործակցությունն առավել արդյունավետ դարձնելուն միտված համատեղ գործողությունների ծրագիր հաստատելու մասին ՀՀ գլխավոր դատախազի առաջարկությունը: -0-
