Հայաստանում 2009 թ.-ի առաջին կիսամյաում որդեգրվել է 30 երեխա, որոնցից կեսը` օտարերկրացիների կողմից

2009 թ.-ի առաջին վեց ամսվա ընթացքում Հայաստանում որդեգրվել է 30 երեխա, ընդ որում նրանցից կեսը որդեգրվել է օտարերկրյա քաղաքացիների կողմից, հաղորդում է ՀՀ ազգային վիճակագրության ծառայությունը՝ հղում անելով ՀՀ աշխատանքի և սոցիալական հարցերի նախարարությանը: Պաշտոնական տվյալների համաձայն՝ որդեգրված երեխաներից 16-ն աղջիկ է:

Վիճակագրական տվյալների համաձայն՝ որդեգրողներն ամենից շատ իրենց խնամքի տակ են վերցրել փոքր տարիքի երեխաների, և 2009 թ.-ի առաջին կիսամյակում  որդեգրվել է մինչև կես տարեկան, կես տարեկանից մեկ տարեկան և մեկ տարեկանից վեց տարեկան 8-ական երեխա, այն դեպքում, երբ վեցից-տասը տարեկան հասակի որդեգրվել է հինգ երեխա, իսկ տասը տարեկանից 15 տարեկան՝ մեկ երեխա: Հաշվետու ժամանակաշրջանում 15-18 տարեկան երեխա չի որդեգրվել:

Հատկանշական է, որ որդեգրված երեխաներից ոչ բոլորն էին որբ. որդեգրված երեխաներից հինգն ունեին երկու ծնող, 21 երեխա ուներ միայն մայր, և միայն որդեգրված չորս երեխա էր ծնողազուրկ, որոնցից երկուսը ընկեցիկ էին, իսկ երկուսը մնացել էին առանց ծնողական խնամքի:

ՀՀ աշխատանքի և սոցիալական հարցերի նախարարության տվյալների համաձայն՝ հավասար թվով երեխաներ են որդեգրվել Հայաստանի և օտարերկրյա քաղաքացիկների կողմից: Այսպես, պաշտոնական տվյալների համաձայն, 15 երեխա մնացել է Հայաստանում և կես տարեկան մեկ երեխա որդեգրվել է ծնողներից մեկի կողմից, 13 երեխա որդեգրվել է ընտանեկան զույգերի կողմից: Եվս մեկ երեխա որդեգրվել է ծնողներից մեկի կողմից՝ ամուսնու համաձայնությամբ:

Առաջին կիսամյակում օտարերկրացիները որդեգրել են 15 հայ երեխա, ընդ որում նրանք բոլորը որդեգրվել են ընտանեկան զույգերի կողմից:

2009 թ.-ի առաջին կիսամյակում ընդհանուր առմամբ կենտրոնացված հաշվառման է վերցվել որդեգրման ենթակա 84 երեխա, որոնցից 40-ը աղջիկներ են: Պաշտոնական վիճակագրության տվյալների համաձայն՝ որդեգրման հաշվառման կանգնեցված երեխաներից 23-ը ունեցել են երկու ծնող, երեքը՝ միայն մեկ ծնող, երկուսը որբ էին, 42 երեխա ունեցել են միայն մայր, մեկ երեխա ընկեցիկ էր, երեք երեխայից ծնողները հրաժարվել են:

Որդեգրման ենթակա երեխաների ամենամեծ քանակությունը գրանցվել է Երևանում (53 երեխա), 13 երեխա հաշվառման է կանգնեցվել Լոռու մարզում, երեքական երեխա՝ Սյունիքի և Գեղարքունիքի մարզում, երկուական երեխա՝ Արագածոտնի, Արմավիրի, Կոտայքի, Շիրակի և Տավուշի մարզերում, մեկական երեխա՝ Արարատի և Վայոց ձորի մարզերում:-0-