ԵՐԵՎԱՆ, 4 սեպտեմբերի. /Նովոստի-Արմենիա/. Հայաստանի ընտրական համակարգի զարգացման աստիճանը ազատ, արդար ընտրություններ անցկացնելու հնարավորություն է տալիս, կարծում է ՀՀ նախագահ Սերժ Սարգսյանը:
«Ժողովրդավարության երկար, բայց անհրաժեշտ ճանապարհը մեզ այսօր բերել է ընտրական համակարգի զարգացման մի աստիճանի, որը հնարավորություն է տալիս անցկացնելու ազատ, արդար ընտրություններ: Բայց ասվածը, իհարկե, չի նշանակում, թե մենք ունենք կատարյալ ընտրական համակարգ: Այստեղ կան բազմաթիվ խնդիրներ, և մենք կարիք ունենք անընդհատ կատարելագործելու մեր ընտրական համակարգը»,- ասել է Սերժ Սարգսյանը` Եվրոպայի ընտրական իշխանությունների ընկերակցության ներկայացուցիչների հետ հանդիպման ժամանակ: Եվրոպայի ընտրական իշխանությունների պատվիրակությունը Երևանում է կազմակերպության 18-րդ տարեկան համաժողովի առիթով:
Ինչպես «Նովոստի-Արմենիա» գործակալությանը հայտնեցին ՀՀ նախագահի մամուլի ծառայությունից, հանդիպման ընթացքում նախագահը կարևորել է միջազգային կազմակերպությունների հետ համագործակցությունը:
Սերժ Սարգսյանը ողջունել է պատվիրակության անդամներին` նշելով, որ այս միջոցառման անցկացումը Երևանում լավ առիթ է ընտրական համակարգի խնդիրների քննարկման և դրական ընտրական փորձի փոխանակման համար:
Նախագահը խնդրահարույց պատճառների թվում նշել է հետխորհրդային երկրներին բնորոշ ընտրական մշակույթի պակասը:
Սերժ Սարգսյանի խոսքով` խնդիրները հաղթահարելու համար անհրաժեշտ է, որ կայանան ընտրական գործընթացին մաս կազմող բոլոր համակարգերը:
Նախագահ Սարգսյանը պատվիրակության անդամներից հետաքրքրվել է ընտրական հանձնաժողովների` կուսակցական կամ մասնագիտական սկզբունքով կազմավորման միջազգային փորձի մասին, նրանց հետ խոսել համաժողովի ընթացքում քննարկվելիք խնդիրներիևւ դրանց լուծման շուրջ ակնկալվող խորհրդատվությունների վերաբերյալ:
Ընկերակցության ներկայացուցիչները, ովքեր երկար տարիներ ներգրավված են Հայաստանի հետ համագործակցությունում, նշել են, որ մեր երկրի ընտրական համակարգի բարելավումն ակնհայտ է և պատրաստակամություն են հայտնել շարունակելու աջակցությունը ժողովրդավարացման ու ընտրական համակարգի հետագա զարգացման գործընթացներին:-0-
