Հետախուզման մեջ գտնվող ընդդիմադիր պատգամավոր Խաչատուր Սուքիասյանը հանձնվել է իրավապահներին
ԵՐԵՎԱՆ, 2 սեպտեմբերի. /Նովոստի-Արմենիա/. Հայկական խորհրդարանի հետախուզման մեջ գտնվող ընդդիմադիր պատգամավոր Խաչատուր Սուքիասյանը հանձնվել է իրավապահներին, «Նվոստի-Արմենիա» գործակալության թղթակցին հայտնեց Գլխավոր դատախազի մամուլի քարտուղար Սոնա Տռուզյանը:
Ազգային ժողովի պատգամավոր և խոշոր ձեռներեց Խաչատուր Սուքիասյանը, ով 2008թ.-ի նախագահական ընտրություններում սատարում էր ՀՀ նախկին նախագահ Լևոն Տեր-Պետրոսյանին, գտնվում էր հետախուզման մեջ 2008թ.-ի մարտի 1-2 զանգվածային անկարգություններին մասնակցելու մեղադրանքով:
«Շուրջ մեկ ժամ առաջ Սուքիասյանն ինքնակամ եկել է Հատուկ քննչական ծառայություն: Որպես կասեցման միջոց ընտրվել է կալանքը»,- ասել է Տռուզյանը:
Նրա խոսքերով, պատգամավորին մեղադրանք է հարուցվել ՀՀ ՔՕ 225 հոդվածի առաջին մասով /բռնությամբ, ավերածություններով, հրկիզմամբ, գույքի ոչնչացմամբ կամ վնասմամբ, հրազենի, պայթուցիկ կամ պայթյունավտանգ սարքերի կիրառմամբ զանգվածային անկարգությունների կազմակերպում կամ իշխանության ներկայացուցչին զինված դիմադրության ցուցադրմամբ/:
2008 թվականի մարտի 1-2-ի դեպքերի ակտիվ մասնակիցներից մեկը՝ ընդդիմադիր «Հայկական ժամանակ» թերթի գլխավոր խմբագիր Նիկոլ Փաշինյանը հուլիսի 1-ին էր հանձնվել հանրապետության իրավապահ մարմիններին:
Նրան մեղադրանք է ներկայացված ՔՕ երկու հոդվածով՝ իշխանության ներկայացուցչի հանդեպ բռնություն կիրառելու և զանգվածային անկարգությունների:
Ընդդիմադիր հրատարակության խմբագիրը մեղադրվում է 2007 թ.-ի հոկտեմբերի 23-ին ոստիկանության աշխատակցի կյանքի համար անվտանգ բռնություն գործելու և 2008 թ.-ի մարտի 1-2-ին Երևանում մի խումբ անձնաց հետ զանգվածային անկարգություններ կազմակերպելու մեջ:
2008թ. փետրվարի 20-ից Երևանի կենտրոնում, ՀՀ նախկին նախագահ Լևոն Տեր-Պետրոսյանի գլխավորությամբ, ընդդիմությունն անցկացնում էր հանրահավաքներ՝ բողոքելով փետրվարի 19-ի նախագահական ընտրությունների արդյունքների դեմ, որոնցում հաղթանակ էր տարել վարչապետ Սերժ Սարգսյանը։ Մարտի 1-2-ի բողոքի ցույցերը վերածվել են անկարգությունների և ցուցարարների ու իրավապահ մարմինների միջև բախումների, որոնց հետևանքով զոհվել է տասը քաղաքացի և վիրավորվել 265-ը։--0
