ԵՐԵՎԱՆ, 31 օգոստոսի. /Նովոստի-Արմենիա/. ՀՀ նախագահ Սերժ Սարգսյանն անվիճելի է համարում սենատոր Քենեդու ջանքերը Արցախի ազատագրման պայքարում:
Ինչպես երեքշաբթի Նովոստի-Արմենիա գործակալությանը հայտնեցին հայկական պետության ղեկավարի մամուլի ծառայությունից, այս մասին ասվում է սենատորի մահվան առնչությամբ ՀՀ նախագահի ուղերձում:
«Խոր ցավով տեղեկացա ամերիկյան քաղաքական գործիչ, սենատոր Էդվարդ Քենեդիի մահվան մասին: Հռչակավոր քաղաքական գործիչների տոհմի ներկայացուցիչը հայ ժողովրդի բարեկամն էր և տասնամյակներ շարունակ իր անուրանալի աջակցությունն էր բերում հայ ժողովրդի և Հայաստանի կենսական շահերին առնչվող ձեռնարկումներում»,- ասվում է ուղերձում:
«Անժխտելի են Էդվարդ Քենեդու ջանքերը Հայոց ցեղասպանության ճանաչման, Արցախի ազատության պայքարին աջակցելու, երկրաշարժից և ռազմական հակամարտությունից տուժած հայերին մարդասիրական օգնություն տրամադրելու ուղղությամբ»,- նշել է հայկական պետության ղեկավարը:
Նրա խոսքերով, Սենատոր Քենեդու՝ բարեկամի, ազատության ու արդարության անխոնջ մարտիկի կերպարը երկար կապրի բոլոր հայորդիներին սրտերում:
«Հայ ժողովրդի և անձամբ իմ անունից խորին ցավակցություն եմ հայտնում Քենեդիների ընտանիքին, Միացյալ Նահանգների կառավարությանը և ժողովրդին»,- ասվում է հաղորդագրության մեջ:
ԱՄՆ սենատոր Էդվարդ Քենեդիի մահվան կապակցությամբ երկուշաբթի Հայաստանում, ԱՄՆ դեսպանությունում սգո մատյան է բացվել, որում դեսպանության այցելուներն իրենց ցավակցություններն են ուղղում Ամերիկայի ժողովրդին։
Սենատոր Քենեդին վախճանվել է նախորդ չորեքշաբթի 77 տարեկան հասակում։ Էդվարդ Քենեդին 1963 թվականին սպանված ԱՄՆ նախագահ Ջոն Քենեդիի և 1968 թվականին սպանված սենատոր Ռոբերտ Քենեդիի կրտսեր եղբայրն է։
Էդվարդ Քենեդին ԱՄՆ Սենատում է եղել 1962 թվականից և իր մահվան պահին եղել է Սենատի առողջապահության և կրթության կոմիտեի նախագահը։ Նախորդ տարվա հունվարից նախագահական ընտրություններում Քենեդին աջակցել է Բարաք Օբամայի թեկնածությանը: -0-
