Ազգային ժողովի նախագահի տեղակալը գրություն է թողել ԱՄՆ դեսպանության սգո մատյանում

Ազգային ժողովի նախագահի տեղակալ Արևիկ Պետրոսյանը երկուշաբթի այցելեց ԱՄՆ դեսպանություն և գրառում կատարեց ԱՄՆ սենատոր Էդվարդ Քենեդիի մահվան կապակցությամբ Հայաստանում ԱՄՆ դեսպանությունում բացված սգո մատյանում, տեղեկացնում է Հայաստանի խորհրդարանի հասարակայնության  հետ կապերի վարչությունը։

«Հայաստանի Հանրապետության Ազգային ժողովի անունից ամերիկյան ժողովրդին, Քենեդիների ընտանիքին հայտնում ենք մեր խորին ցավակցությունները Դեմոկրատական կուսակցության ակնառու ներկայացուցիչ, բազմափորձ սենատոր, հայ ժողովրդի անկեղծ բարեկամ Էդվարդ Քենեդիի մահվան կապակցությամբ: Նրա հիշատակը վառ կմնա մեր սրտերում»,- ասվում է Արևիկ Պետրոսյանի գրության մեջ։

ԱՄՆ սենատոր Էդվարդ Քենեդիի մահվան կապակցությամբ երկուշաբթի Հայաստանում, ԱՄՆ դեսպանությունում սգո մատյան է բացվել, որում դեսպանության այցելուներն իրենց ցավակցություններն են ուղղում Ամերիկայի ժողովրդին։

Սենատոր Քենեդին վախճանվել է նախորդ չորեքշաբթի 77 տարեկան հասակում։ Էդվարդ Քենեդին 1963 թվականին սպանված ԱՄՆ նախագահ Ջոն Քենեդիի և 1968 թվականին սպանված սենատոր Ռոբերտ Քենեդիի կրտսեր եղբայրն է։

Էդվարդ Քենեդին ԱՄՆ Սենատում է եղել 1962 թվականից և իր մահվան պահին եղել է Սենատի առողջապահության և կրթության կոմիտեի նախագահը։ Նախորդ տարվա հունվարից նախագահական ընտրություններում Քենեդին աջակցել է Բարաք Օբամայի թեկնածությանը: -0-