Վրաստանից վերադարձող հայուհին ՃՏՊ-ի զոհ է դարձել

ԵՐԵՎԱՆ, 31 օգոստոսի. /Նովոստի-Արմենիա/. Վրաստանի Քոբուլեթի հանգստավայրից վերադառնալիս՝ 40-ամյա զբոսաշրջուհի Մարիամ Գուլոյանը ուրբաթ երեկոյան զոհվել է Հայաստանի ավտոմայրուղիներից մեկում տեղի ունեցած ՃՏՊ-ի արդյունքում, երկուշաբթի հայտնում է ՀՀ ԱԻՆ Փրկարար ծառայությունը: 

«Օգոստոսի 28-ին, ժամը 10.00-ին Արագածոտնի մարզում` Աշտարակ – Երևան ավտոճանապարհի 9-րդ կմ-ում Երևանի ուղղությամբ ընթացող «Միթսուբիշի» մակնիշի 06 ՍՍ 804 պ/հ միկրոավտոբուսը (վարորդ` Արսեն Ասրյան) բախվել է ճամփեզրին կայանած «ՊԱԶ» մակնիշի ԱՄ 0906 Լ պ/հ ավտոբուսին, որի հետևանքով տարբեր մարմնական վնասվածքներ են ստացել միկրոավտոբուսի վարորդն ու 11 ուղևորները»,- ասվում է հաղորդագրության մեջ:

Փրկարարների ուժերով տուժածները դուրս են բերվել ավտոմեքենայից և ստանալով առաջին բուժօգնություն` տեղափոխվել Աշտարակի հիվանդանոց, որտեղից էլ շտապօգնության բրիգադներով նրանց տեղափոխել են Երևանի «Արմենիա» և «Սուրբ Աստվածամայր» բժշկական կենտրոններ:

«Ժամը 17.00-ի սահմաններում «Արմենիա» բժշկական կենտրոնում գտնվող 40-ամյա Մարիամ Գուլոյանը ստացած վնասվածքներից մահացել է, իսկ մյուս տուժածների առողջական վիճակը բժիշկները գնահատել են ծանր և միջին ծանրության»,- ասվում է հաղորդագրության մեջ:--0--