ԵՐԵՎԱՆ, 31 օգոստոսի. /Նովոստի-Արմենիա/. Տնտեսական անկումը Հայաստանում 2009 թ.-ի արդյունքներով շուրջ 12-14 տոկոս կկազմի, իսկ սղաճը` 6 տոկոս, երկուշաբթի լրագրողներին ասաց Համաշխարհային բանկի երևանյան գրասենյակի ղեկավար Արիստոմենե Վարուդակիսը:
ՀՀ Ֆինանսների նախարարության գնահատականներով, տնտեսական անկումը երկրում ընթացիկ տարվա արդյունքներով կգտնվի 10-15 տոկոսի սահմաններում: Տնտեսական անկումը, օպերատիվ վիճակագրական տվյալներով, 2009 թ.-ի հունվար-հուլիսին 18,5 տոկոս է կազմել: Ընդ որում ՀՆԱ ծավալը 1417,1 մլրդ դրամ է կազմել /3789,6 մլն դոլար/:
Վարուդակիսի խոսքերով, չնայած 2009 թ.-ի առաջին 7 ամսում 2008 թ.-ի նույն ժամանակահատվածի համեմատ տնտեսության անկման զգալի աճ է դիտարկվել` 18,5 տոկոս, ոգեշնչում է այն փաստը, որ հուլիսին, հունիսի համեմատ, նկատվում են որոշակի դրական միտումներ:
Ինչպես նշեց ՀԲ երևանյան գրասենյակի ղեկավարը, անգամ ճգնաժամից ամենից շատ տուժած շինարարության ոլորտում 2009 թ.-ի հուլիսին հունիսի համեմատ ակտիվությունն ավելացել է 4,5 տոկոսով, արդյունաբերական արտադրությունն աճել է 6 տոկոսով, իսկ էլեկտրաէներգիայի արդյունաբերությունը աճել է 2 տոկոսով:
Նրա գնահատականներով, փոփոխություններից շատերը սեզոնային բնույթ են կրում, սակայն ընդհանուր տպավորություն է ստեղծվում, որ տնտեսության անկման գործընթացը կանգ է առել:
«Հաշվի առնելով աշխարհում ընդհանուր տնտեսական իրավիճակի բարելավումը, մասնավորապես ԱՄՆ-ում և Եվրոպայում, բազային ապրանքների գների աճը, այդ թվում պղնձի ու մոլիբդենի, մենք ակնկալում ենք, որ տնտեսական անկումը Հայաստանում 2009 թ.-ի արդյունքներով շուրջ 12-14 տոկոս կկազմի»,- ասաց Վարուդակիսը:
Միևնույն ժամանակ, նրա խոսքերով, ՀԲ կանխատեսումների համաձայն, սղաճը Հայաստանում տարեվերջի տվյալներով շուրջ 6 տոկոս կկազմի:
«Նման բարձր սղաճի պատճառն այն փաստ կդառնա, որ տնտեսության կայունացման պարագայում ազգային արժույթի արժեզրկման միտումներն ավելի բարձր գների տեսքով կարտահայտվեն, ինչին կավելանա նաև էներգակիրների և նավթի գների աճը»,- ասաց Վարուդակիսը:
Ընդ որում, նա հավելեց, որ 12-ամսյա կտրվածքում սղաճն ավելի ցածր կլինի հաշվի առնելով այն, որ մինչ այժմ այն պահպանվում է բավականին ցածր մակարդակում: -0-
