Հայաստանը ցեղասպանության ճանաչումը չի դիտարկում որպես նախապայման Թուրքիայի հետ հարաբերություններ հաստատելու համար. նախագահ
Հայաստանը ցեղասպանության ճանաչումը չի դիտարկում որպես նախապայման Թուրքիայի հետ փոխհարաբերություններ հաստատելու համար, հայտարարել է ՀՀ նախագահ Սերժ Սարգսյանը:
«Մենք չենք դիտարկում Ցեղասպանության ճանաչումը որպես նախապայման Թուրքիայի հետ փոխհարաբերություններ հաստատելու համար», - ասել է նախագահը ВВС հեռուստաընկերությանը տված հարցազրույցում:
Միաժամանակ Սարգսյանն ընդգծել է, որ Թուրքիայի կողմից Ցեղասպանության ճանաչումը շատ կարևոր է՝ ինչպես Հայաստանի և Թուրքիայի, այնպես էլ ողջ աշխարհի համար:
«Կարևորն այն է, որ պատմական արդարությունը վերականգնվի: Կարևոր է, որ մեր ժողովուրդները կարողանան նորմալ փոխհարաբերություններ հաստատել: Եվ վերջապես, կարևոր է, որ ապագայում դա չկրկնվի», - հայտարարել է ՀՀ նախագահը:
Միաժամանակ Սերժ Սարգսյանը նշել է, որ Հայոց ցեղասպանության հարցում հանրապետության նման դիրքորոշումը չի կարելի փոխզիջում անվանել:
«Մենք ասում ենք՝ այո, եղել է ցեղասպանությունը և անկախ այն բանից, թե կճանաչի դա այսօր Թուրքիան, թե ոչ, կա այդ փաստը, որը ճանաչվել է աշխարհի ցեղասպանագետների, աշխարհի բազմաթիվ երկրների կողմից: Սակայն այս պայմաններում մենք դա չենք ընդունում որպես պայման՝ թուրքերի հետ հարաբերություններ հաստատելու համար», - ընդգծել է ՀՀ նախագահը:
1915-1923 թթ-ի Հայոց ցեղասպանությունը 20-րդ դարի առաջին ցեղասպանությունն է, որը կազմակերպվել և ծրագրված կերպով իրագործվել է երիտթուրքերի կառավարության կողմից։ Զանգվածային ջարդերի ու տեղահանման արդյունքում զոհվել է շուրջ 1,5 մլն մարդ, 350 հազար հայ փախել է Կովկաս ու Եվրոպա, իսկ 20-րդ դարի սկզբին Թուրքիայում բնակվող 2 մլն հայից 150 հազարն է մնացել այնտեղ։
Հայոց ցեղասպանության փաստը ճանաչել են բազմաթիվ երկրներ, մասնավորապես, Ուրուգվայը, Լիտվան, Ռուսաստանը, Ֆրանսիան, Իտալիայի խորհրդարանի ստորին պալատը, ԱՄՆ-ի մեծ թվով նահանգներ, ինչպես նաև Հունաստանի, Կիպրոսի, Արգենտինայի, Բելգիայի, Ուելսի խորհրդարանները, Շվեյցարիայի ազգային խորhուրդը, Կանադայի խորհրդարանի համայնքների պալատը, Լեհաստանի սեյմը, ԱՄՆ 50 նահանգներից 42-ը: -0-
