Վրաստանը պետք է հաշտվի Աբխազիայի և Հարավային Օսեթիայի կորստի հետ. ՀՀԿ պատգամավոր

ԵՐԵՎԱՆ, 28 օգոստոսի. /Նովոստի-Արմենիա/. Վրաստանը պետք է հաշտվի Աբխազիայի և Հարավային Օսեթիայի կորստի հետ, հայտարարեց  Հայաստանի հանրապետական կուսակցության պատգամավոր, Հայաստանի խորհրդարանի մարդու իրավունքի պաշտպանության և հասարակական հարցերի մշտական հանձնաժողովի փոխնախագահ Ռաֆիկ Պետրոսյանը։  

«Նրանք պետք է հասկանան, որ այս հարցը վերջնականապես փակված է, և այս երկու պետություններն արդեն անկախ են Ռուսաստանի հովանավորության ներքո։ Վրաստանը երբեք չի կարող վերադարձնել այդ տարածքները»,- ուրբաթ լրագրողներին հայտնեց Պետրոսյանը։

Նրա խոսքերով, Վրաստանը կարող է վերադարձնել Աբխազիան և Օսեթիան «միայն այն դեպքում, եթե Ռուսաստանը չլինի»։

Միաժամանակ նա նշեց, որ Հայաստանը կարող է միջնորդի առաքելություն կատարել Թբիլիսիի և Մոսկվայի միջև։

«Այսօր ռուս-վրացական հարաբերությունները շատ վատ վիճակում են, և անհրաժեշտության դեպքում Հայաստանը կարող է միջնորդ դառնալ երկու երկրների միջև հարաբերությունների բարելավման հարցում»,- ասաց Պետրոսյանը։

Նա նշեց նաև, որ վրացական իշխանությունները խորապես սխալվում են՝ սրելով հարաբերությունները Հայաստանի հետ։

«Հայաստանը երբեք Վրաստանի համար վտանգ չի ներկայացրել։ Հակառակը, որքան լավ հարաբերություններ ունենա Վրաստանը Հայաստանի հետ, այնքան կզարգանան առևտրատենտեսական կապերը երկու երկրների միջև»,- նշեց Պետրոսյանը։

Նրա խոսքերով, Վրաստանը ճիշտ կգործի, եթե փոխի իր քաղաքականությունը հայերի նկատմամբ։

«Չնայած գաղտնիք չէ, որ վրացական իշխանությունները հայատյաց քաղաքականություն են իրականացնում՝ սկսած հայկական հուշարձանների յուրացումից մինչև տարբեր միջազգային կազմակերպություններում Հայաստանին դեմ քվեարկելը։ Այս իրավիճակում մեր պետական միջամտությունն անհրաժեշտություն է»,- նշեց Պետրոսյանը։ -0-