Հայաստանի ֆինանսների նախարարը կտրականապես դեմ է պետբյուջեի սեկվեստրին։
«Բյուջեի սեկվեստրի իրականացումը ճգնաժամի պայմաններում աննպատակահարմար է, քանի որ երբ տնտեսությունը ռեցեսիայի փուլում է, կարևոր է իրականացնել ընդլայնող քաղաքականություն»,- ուրբաթ «Նովոստի» միջազգային մամուլի կենտրոնում տեղի ունեցած մամուլի ասուլիսի ժամանակ ասաց Դավթյանը։
Նա նշեց, որ պետությունը տնտեսության մեջ բավական լուրջ խաղացող է, և նրա խնդիրն է ապահովել լրացուցիչ ռեսուրսների հոսքը և ծախսերի մեծացումը, ինչն անում են նմանատիպ հնարավորություն ունեցող աշխարհի բոլոր երկրները։
Ինչպես նշեց նախարարը, չնայած բոլոր երկրներում արձանագրված ծախսերի կրճատմանը, պետությունները փորձում են չկրճատել ծախսերը՝ դրանով իսկ միջոցներ ներդնելով տնտեսության մեջ և խթանելով դրա զարգացումը։
Ծախսերի կրճատումը, նախարարի խոսքերով, «կնշանակի ևս մեկ բացասական հարված երկրի ՀՆԱ-ին»։
«Եթե մենք սեկվեստր իրականացնենք և կրճատենք ծախսերը, ապա ՀՆԱ-ն մեզ մոտ ոչ թե 18,5 տոկոս, այլ զգալիորեն ավելի շատ կկազմի՝ դրանով իսկ բացասական մուլտիպլիկատիվ ազդեցություն կգործի տնտեսության վրա։ Տնտեսական քաղաքականության տեսակետից, ես կտրականապես դեմ եմ ծախսերի կրճատմանը, հակառակը, մենք պետք է անենք ամեն ինչ դրանց ավելացման համար»,- ասաց Դավթյանը։
Միևնույն ժամանակ, նրա խոսքերով, սեկվեստրը կնշանակի սոցիալական և կապիտալ ծախսերի կրճատում, որոնցից առաջացած բացասական ազդեցությունն անմիջականորեն կանդրադառնա տնտեսության վրա։
Նախարարն ընդգծեց, որ կառավարությունը կանխամտածված կերպով գնաց այլ քայլի՝ պահպանելով հիմնական ծախսերը եկամուտների կրճատման օբյեկտիվ պայմաններում, ինչը փոխհատուցվեց տնտեսության խթանման համար օտարերկրյա ներգրավված միջոցներով և ավելացնելով պետբյուջեի դեֆիցիտը։
«Սա ավելի լավ է, քան սեկվեստրն ու տնտեսության լրացուցիչ բացասական խթանները, և սա միակ ճիշտ ճանապարհն է»,- կարծում է Դավթյանը։
Միաժամանակ նախարարն ընդգծեց, որ կառավարությունը տվյալ պահին չունի սեկվեստրի իրականացման մտադրություններ և ծրագրեր, հակառակը, իշխանությունները փորձում են պահպանել ծախսերի հնարավոր բարձր մակարդակը, «սակայն ոչինչ բացառել չի կարելի»։ -0-
