Հայաստանում տնտեսական իրավիճակն ավելի կայուն է, քան տնտեսապես ավելի ուժեղ երկրներում. Ֆինանսների նախարարություն

ԵՐԵՎԱՆ, 28 օգոստոսի. /Նովոստի-Արմենիա/. Հայաստանում տնտեսական իրավիճակը զգալիորեն ավելի կայուն է, քան տնտեսապես ավելի ուժեղ երկրներում, հայտարարեց Հայաստանի ֆինանսների նախարար Տիգրան Դավթյանը։

«Գլոբալ ճգանաժամի հետ կապված աղետներն ավելի շոշափելի են Հայաստանից տնտեսապես ավելի ուժեղ երկրներում, մասնավորապես, Բալթյան երկրներում, Ուկրաինայում, Հունգարիայում։ Հայաստանում համեմատաբար իրավիճակն ավելի կայուն է»,- ուրբաթ «Նովոստի» միջազգային մամուլի ակումբում ասաց Դավթյանը։

Միաժամանակ, Դավթյանի խոսքերով, ի տարբերություն ԱՊՀ մի շարք երկրների, Հայաստանը չունի այն ամորտիզատորները, որոնք ունեցել են բազմաթիվ երկրներ, մասնավորապես, չունի լեռնահումքային ռեսուրսներ և ձևավորված հիմնադրամներ։

«Ռուսաստանը, Ղազախստանը, Ուզբեկստանը, Ադրբեջանը բավական մեծ կուտակումներ ունեին, որոնց հաշվին նրանց հաջողվել է փակել դեֆիցիտը։ Հայաստանը նման հնարավորություններ չի ունեցել, այդ պատճառով այն ավելի խոցելի է եղել գլոբալ ճգնաժամի համատեքստում»,- պարզաբանեց նա՝ ավելացնելով, որ բացի այդ, հայկական տնտեսության չափերն անհամեմատելի են Ղազախստանի կամ Ռուսաստանի նման խոշոր երկրների հետ։

Այդ կապակցությամբ Ֆինանսների նախարարը նշեց, որ ճգնաժամի առավելագույն ազդեցությունը նկատվել է Բալթյան երկրներում, չնայած, որ նրանց տնտեսությունների կայունությունն ավելի բարձր էր թվում։

«Սակայն նրանց նկատմամբ ազդեցությունն ավելի էական է եղել, և տնտեսական անկումը գերազանցել է Հայաստանի անկումը, ընդ որում հատկանշական է, որ նրանք նման են եղել Հայաստանին լեռնահումքային ռեսուրսների և հիմնադրամների բացակայությամբ տնտեսության ոչ մեծ ծավալի և բաց լինելու դեպքում»,- ընդգծեց նա՝ հավելելով, որ ՀՆԱ անկումը Բալթյան երկրներում գերազանցել է 20 տոկոսը։

Միաժամանակ, Դավթյանի խոսքերով, այդ երկրներում տնտեսական և բյուջետային կայունության տեսանկյունից իրավիճակն ավելի ծանր է, քան Հայաստանում։

«Այդ երկրներում կրճատումներ են անցկացվել սոցիալական ծախսերի և ծրագրերի գծով, բանկային համակարգը բավական լուրջ խնդիրներ է ունեցել»,- ասաց նա՝ նշելով, որ սոցիալական վճարումների ծախսերը Հայաստանում չեն կրճատվել։

Տնտեսական անկումն, օպերատիվ վիճակագրական տվյալներով, 2009 թվականի հունվար-հուլիսին կազմել է 18,5 տոկոս։ Միաժամանակ ՀՆԱ ծավալը կազմել է 1417,1 միլիարդ դրամ (3789,6 միլիոն դոլար)։ -0-