ԵՐԵՎԱՆ, 26 օգոստոսի. /Նովոստի-Արմենիա/. ՀՀ ճանապարհային ոստիկանությունը նախապատրաստական աշխատանքներ է տանում ուսումնական տարվա սկզբի կապակցությամբ սեպտեմբերի 1-10-ը Անվտանգ երթևեկության տասնօրյակի անցկացման համար:
Այս մասին չորեքշաբթի լրագրողներին հայտնեց ՀՀ ճանապարհային ոստիկանության ճանապարհապարեկային ծառայության բաժնի պետ, գնդապետ Նորիկ Սարգսյանը:
«Դպրոցներին հարակից փողոցների բոլոր հատվածներում կհերթապահեն ճանապարհապարեկային ծառայության տեսուչները երեխաների անվտանգությունն ապահովելու համար»,- ասաց նա:
Ընդ որում, Սարգսյանն ընդգծեց, որ ճանապարհային ոստիկանությունը կձեռնարկի բոլոր հնարավոր միջոցները, որպեսզի ոչ մի ավտոմոբիլային խցանում կամ դժբախտ պատահար այդ օրերին չգրանցվի: -0-
