Ռուս գրոսմայստեր Էռնեստո Ինարկիևը ֆենոմենալ ձեռքբերում է համարում Հայաստանի հավաքականի անընդմեջ հաղթանակները շախմատի երկու օլիմպիադաների ժամանակ:
«Հաղթել երկու անգամ անընդմեջ ֆենոմենալ ձեռքբերում է: Ես՝ որպես ռուս, միշտ նեղսրտել եմ, սակայն ձեռքբերումը ֆենոմենալ է, այն շատ դժվար է գերագնահատել», - Ջերմուկում ՖԻԴԵ-ի Գրան-պրի մրցաշարի հինգերորդ փուլի փակման արարողության ժամանակ «Նովոստի-Արմենիա» գործակալությանը հայտարարեց Ինարկիևը:
Ինչ վերաբերում է վերջին երկու օլիմպիադաների ժամանակ Ռուսաստանի հավաքականի անհաջողությունների պատճառներին, ապա նրա խոսքերով, «դա շատ բարդ պատմություն է, շատ քննարկումներ են եղել և դրանք վերլուծելու անհրաժեշտտություն կա»:
Ինարկիևն ավելացրեց, որ հաջորդ օլիմպիադան ցույց կտա՝ արվե՞լ են, արդյոք, եզրահանգումներ անհաջողություններից:
Ռուս գրոսմայստերը մեկնաբանեց նաև Ջերմուկում ավարտված մրցաշարը՝ ընդգծելով, որ «այն շատ հետաքրքիր էր, շատ արդյունավետ հանդիպումներ կայացան»:
Ինարկիևը հատկապես նշեց մրցաշարի հիանալի պատրաստվածությունը, կազմակերպիչների բարձր պրոֆեսիոնալիզմը:
«Մրցաշարի կազմակերպումը բարձր մակարդակի վրա էր: Զգացվում էր, որ կազմակերպիչները գիտեն, թե ինչ է անհրաժեշտ նման մրցաշար անցկացնելու համար, ինչ է անհրաժեշտ շախմատիստներին, ինչպիսի տեսք պետք է այն ունենա», - նշեց նա:
«Ես չգիտեմ, թե ինչպես էր հանդիսատեսի համար, սակայն ինձ համար՝ որպես խաղացողի, շատ հարմարավետ էր: Եվ ես կարծում եմ, որ հնարավոր ամեն բան արվել էր», - ավելացրեց նա:
Երիտասարդ գրոսմայստերի ուշադրությունից չէր վրիպել նաև Ջերմուկի բնության գեղեցկությունը: Նա նշեց, որ առաջին անգամն է Հայաստանում և հասցրել է տեսնել միայն Ջերմուկը:
«Այստեղ շատ գեղեցիկ վայրեր, լեռներ կան, ես տեսել եմ ջրվեժը, լիճը: Այստեղ շատ գեղեցիկ է, այս վայրը ինձ շատ դուր եկավ», - հայտարարեց նա:
Ինչ վերաբերում է ՖԻԴԵ-ի Գրան-Պրի մրցաշարում ժամկետից շուտ տարած հաղթանակից հետո շախմատի թագի համար պայքարում Լևոն Արոնյանի պատրաստվածությանը, ապա Ինարկիևն ասաց, որ մարդը, ով ընտրություն է անցել և ավելին՝ մինչ այդ նվաճել է Աշխարհի գավաթը, կարող է և պետք է պայքարի չեմպիոնի տիտղոսի համար:
ՖԻԴԵ-ի Գրան-պրի մրցաշարի հինգերորդ փուլն անցկացվում էր Ջերմուկում օգոստոսի 8-ից 24-ը, այն նվիրված էր 2009-ին նշվող աշխարհի իններորդ չեմպիոն Տիգրան Պետրոսյանի 80-ամյակին:
19-րդ կատեգորիայի մրցաշարին մասնակցում էին գրոսմայստերներ Լևոն Արոնյանը (Հայաստան), Դմիտրի Յակովենկոն (Ռուսաստան), Պետեր Լեկոն (Հունգարիա), Բորիս Գելֆանդը (Իսրայել), Էթյեն Բակրոն (Ֆրանսիա), Սերգեյ Կարյակինը (Ուկրաինա), Գատա Կամսկին (ԱՄՆ), Պավել Էլյանովը (Ուկրաինա), Եվգենի Ալեքսեևը (Ռուսաստան), Վլադիմիր Հակոբյանը (Հայաստան), Վասիլի Իվանչուկը (Ուկրաինա), Իվան Չեպարինովը (Բուլղարիա), Էռնեստո Ինարկիևը (Ռուսաստան), Ռուստամ Կասիմջանովը (Ուզբեկստան):
Մրցաշարում 8,5 միավորով հաղթանակ տարավ Վասիլի Իվաչուկը: Երկրորդ-երրորդ տեղերը 8-ական միավորով կիսեցին Լևոն Արոնյանն ու Բորիս Գելֆանդը:-0-
