ԵՐԵՎԱՆ, 24 օգոստոսի. /Նովոստի-Արմենիա/. Ֆրանսիայում գործող «Չոբանյան» հեղինակավոր հայկական ինստիտուտը ֆրանս-վրացական խորհրդարանական բարեկամական խմբի նախագահ Դենիել Պոլին «Վահագն Չախալյանը մահվան սպառնալիքի տակ է» խորագրով նամակ է ուղղել, որում մտահոգություն է հայտնում այն մասին, որ Վրաստանում կալանքի մեջ գտնվող հայ ակտիվիստ Վահագն Չախալյանը ֆիզիկական վերացման վտանգի մեջ է։
«Նովոստի-Արմենիա» գործակալությանը տրամադրած նամակում նշվում է, որ Ջավախքի (Վրաաստանի հայաբնակ տարածաշրջան) հայ ակտիվիստ, «Միասնական Ջավախք» շարժման առաջնորդ Վահագն Չախալյանին վտանգ է սպառնում։
««Երկիր» միությունը տեղեկացրել է մեզ, որ, ըստ հավաստի աղբյուրների, վրացական իշխանությունները կարող են բռնություն գործադրել «Միասնական Ջավախք» ժողովրդավարական շարժման առաջնորդ Վահագն Չախալյանի նկատմամբ ` նրան չեզոքացնելու կամ վերացնելու նպատակով»,- նշվում է փաստաթղթում։
Նամակում նշվում է, որ այս հաղորդագրության հավաստիության անուղղակի ապացույց է այն, որ հուլիսի 31-ին Վահագն Չախալյանին Թբիլիսիի Գլդանիի №8 մեկուսարանից տեղափոխելը Ռուսթավի քաղաքի №2 գաղութ, որտեղ «հնարավոր սադրանք կազմակերպելու առումով հնարավորությունները ավելի բարենպաստ են»։
Ֆրանսահայերի կազմակերպության ներկայացուցիչների կարծիքով, այդ ամենն արվում է այն պայմաններում, երբ նրա նկատմամբ դատավճռի բողոքարկումը ընթացքի մեջ է:
«Ֆրանսիան, որպես մարդու իրավունքների երկիր, չի կարող մնալ անտարբեր այս իրավիճակի նկատմամբ: Մենք հորդորում ենք Ձեզ միջամտել` Ձեր վրացի պաշտոնակիցներից պահանջելով, առաջին հերթին`անմիջապես ապահովել Վահագն Չախալյանի ֆիզիկական անվտանգությունը, իսկ այնուհետև` երաշխավորել անկողմնակալ դատավարության նրա իրավունքը` հնարավորություն տալով նրան պաշտպանվելու իր կողմից ընտրված փաստաբանի միջոցով, հնարավորություն, որից նա առայսօր զրկված է»,- ընդգծվում է նամակում։
Փաստաթղթում նշվում է, որ «Երկիր» հասարակական կազմակերպությունների միությունների տվյալներով, վրացական իշխանությունները իրականացնում են հստակ ծրագիր` ուղղված ջավախահայության արտագաղթի խրախուսմանը և հայաբնակ տարածքների վրացականացմանը:
«2008թ. հուլիսին ձերբակալված ջավախահայության քաղաքացիական շարժման առաջնորդը բանտում է այն բանի համար, որ համարձակվել է պահանջել տարածաշրջանում հայերենին վրացերենին համահավասար վարչական լեզվի կարգավիճակ տալ: Հայկական եկեղեցիները Թբիլիսիում վերածվում են վրացական ուղղափառ եկեղեցիների վրացական իշխանությունների ուղղակի մեղսակցությամբ: Այս հալածանքների համատեքստում Վահագն Չախալյանը խորհրդանշական թիրախ է դարձել ոստիկանության և դատարանի ագրեսիայի համար»,- նշվում է նամակում:
Վահագն Չախալյանը 2009 թ.-ի ապրիլի 7-ին Վրաստանի Ախալցխայի շրջանային դատարանի կողմից դատապարտվել է 10 տարվա ազատազրկման: Մի շարք հայկական կազմակերպություններ նրա դեմ հարուցված մեղադրանքները շինծու են համարում: -0-
