ՀՀ նախագահի՝ հայ-թուրքական հարաբերությունները կարգավորելու փորձերը ձախողման են դատապարտված. ընդդիմություն
ՀՀ նախագահ Սերժ Սարգսյանն իր անզգույշ քաղաքականությամբ տապալեց հայ-թուրքական հարաբերությունները կարգավորելու գործընթացը, ուրբաթ մամուլի ասուլիսի ժամանակ հայտարարեց ՀԱԿ կենտրոնական գրասենյակի համակարգող Լևոն Զուրաբյանը:
«ՀՀ նախագահ Սերժ Սարգսյանն իր անզգույշ քաղաքականությամբ տապալեց հայ-թուրքական հարաբերությունները կարգավորելու գործընթացը, և այժմ ոչ մի բան չի կարող վերականգնել կորսվածը»,- հայտնեց Զուրաբյանը:
Նրա խոսքերով, նախագահ Սարգսյանը խաբվել է գերտերությունների տված այն խոստումներից, թե հայ-թուրքական հարաբերությունների նորմալացումը կապված չի լինի Ղարաբաղյան հակամարտության կարգավորման հետ, սակայն դա տեղի չունեցավ, և Թուրքիան շարունակում է վարել նախապայմանների իր նախկին քաղաքականությունը:
Զուրաբյանը կարծում է, որ ներքաղաքական լարվածությունից ելնելով՝ նախագահ Սարգսյանը գնաց արմատական փոփոխությունների ՀՀ արտաքին քաղաքականության մեջ, սակայն նա հայկական կողմի համար անընդունելի զիջումների գնաց:
Մասնավորապես, նախագահը համաձայնեց 2009 թ.-ի ապրիլի 22-ին գաղտնի համաձայնագիր /«ճանապարհային քարտեզ»/ կնքել Թուրքիայի հետ, ինչը բոլորովին չի բխում Հայաստանի շահերից»,- ասաց նա:
Թուրքիայի և Հայաստանի արտգործնախարարությունները, ինչպես նաև Շվեյցարիայի արտաքին գործերի դաշնային դեպարտամենտն ապրիլի 23-ի գիշերը հարաբերությունների կարգավորման համատեղ հայտարարություն են արել: Հայտարարության մեջ ասվում է, որ կողմերը համաձայնության են հանգել իրենց երկկողմ հարաբերությունների կարգավորման համապարփակ շրջանակի շուրջ երկու կողմերին գոհացնող կերպով: Այս համատեքստում սահմանվել է ճանապարհային քարտեզ:
«Նախագահ Սարգսյանի զիջման քաղաքականությունը հանգեցրեց նրան, որ տապալվեց հայկական սփյուռքի արդյունավետ աշխատանքը՝ 1915 թ.-ի հայերի Ցեղասպանության միջազգային ճանաչման ուղղությամբ»,- հավելեց Զուրաբյանը:
Հայաստանի և Թուրքիայի միջև բացակայում են դիվանագիտական հարաբերությունները, իսկ հայ-թուրքական սահմանը պաշտոնական Անկարայի նախաձեռնությամբ փակ է 1993թվից։
Թուրքիան երկկողմ հարաբերությունների հաստատման համար մի շարք նախապայմաններ է առաջ քաշում, մասնավորապես, Օսմանյան կայսրությունում Հայոց ցեղասպանության միջազգային ճանաչման քաղաքականությունից հրաժարում, երբ սրի էր հանվել շուրջ մեկուկես միլիոն հայ։ Բացի այդ, Թուրքիան ղարաբաղյան հակամարտության կարգավորման հարցում զբաղեցնում է ադրբեջանամետ դիրքորոշում։
Հարաբերություններում առաջին տեղաշարժերը նկատվեցին 2008 թ.-ի սեպտեմբերի 6-ին, երբ Թուրքիայի նախագահ Աբդուլա Գյուլը ՀՀ նախագահ Սերժ Սարգսյանի հրավերով առաջին անգամ այցելեց Երևան՝ 2010 թ.-ի աշխարհի առաջնության ընտրական փուլի շրջանակներում Հայաստանի և Թուրքիայի հավաքականների միջև ֆուտբոլային հանդիպումը դիտելու նպատակով։ Այցի ընթացքում երկու պետությունների ղեկավարները քննարկեցին երկկողմ հարաբերությունների հաստատման հնարավորությունները։--0--
