Հայաստանում 2009 թվականի առաջին կիսամյակում հանցավորությունն աճել է 71 տոկոսով. Ոստիկանապետ

ԵՐԵՎԱՆ, 21 օգոստոսի. /Նովոստի-Արմենիա/. Հայաստանում 2009 թվականի առաջին կիսամյակում հանցավորությունն աճել է 71 տոկոսով, ուրբաթ տեղեկացրեց ՀՀ  ոստիկանապետ Ալիկ Սարգսյանը։ Նրա խոսքերով, 2009 թվականին արձանագրվել է 6849 հանցագործություն՝ 2008 թվականի 3998 հանցագործության դիմաց։

«Համեմատելով այս և նախորդ տարվա ցուցանիշները՝ կարող եմ ասել, որ գրանցվել է հանցագործությունների աննախադեպ աճ, ինչին ես հանգիստ եմ նայում, առանձնահատուկ ոչինչ չեմ տեսնում»,- ասաց նա։

Ոստիկանապետի խոսքերով, հանցավորության աննախադեպ աճը մի քանի պատճառ ունի։ «Առաջին հերթին, հանցավորությունը սոցիալական երևույթ է, և հանցավորության աճը սոցիալական արմատներ ունի»,- ընդգծեց Ալիկ Սարգսյանը։

Նա նշեց, որ Քրեակատարողական օրենսգրքում կատարած փոփոխությունների պատճառով և համաձայն դատախազության հետ ձեռք բերած պայմանավորվածության, Ոստիկանության վիճակագրությունում ընդգրկվել է 1324 հանցագործություն, որոնց փաստով քրեական գործերի հարուցումը մերժվել է՝ ելնելով գործի նյութերից, ինչպես նաև 134 գործ, որոնք դադարեցվել են տուժածների դիմումի համաձայն։ «Այս հանցագործությունները կատարվել են նախորդ տարի, բայց այդ ժամանակ դրանք չեն գրանցվել»,- նկատեց նա։ 

Բացի այդ, աճի վրա ազդել է նաև գաղտնի հանցավորության աճը, այդ թվում՝ կապված տնտեսական հանցագործությունների, թմրանյութեր ու զենք պահելու հետ։

Արձանագրված հանցագործությունների թվի աճի վրա է ազդել նաև հաջող պայքարը հանցագործությունները չգրանցելու արատավոր պրակտիկայի դեմ։ Այդ կապակցությամբ Ոստիկանապետը նշեց, որ Ոստիկանությունն արձանագրել է բազմաթիվ դեպքեր, երբ քաղաքացիները տարբեր պատճառներով իրենք չեն դիմել ոստիկանություն։

Վերջում ոստիկանապետը նշեց, որ հանցավորությունը բոլոր ժամանակներում եղել է և կլինի, և ողջ հարցը դրա դեմ արդյունավետ պայքարելն է։

Այս առումով նա ասաց, որ, չնայած հանցավորության աճին, արձանագրվել է նաև միջին հաշվով 10 տոկոսով բացահայտում՝ ըստ հանցագործությունների բոլոր տեսակների։ -0-