Հայաստանը կմասնակցի Մոսկվայում անցկացվելիք «Գրքի միջազգային ցուցահանդես-տոնավաճառին»

Հայաստանը կմասնակցի Մոսկվայում  կայանալիք 22-րդ «Գրքի միջազգային ցուցահանդես-տոնավաճառին», որը կանցկացվի սեպտեմբերի 2-ից 7-ը, տեղեկացնում է Հայաստանի մշակույթի նախարարությունը։

Հայաստանն 1998 թ.-ից ավանդաբար մասնակցում է այս ցուցահանդեսին պետական մակարդակով։

Այս տարի մոսկովյան ցուցահանդես-տոնավաճառում Հայաստանը կներկայանա ավելի քան 150 անվանում գրքով, որոնցից  100-ը պետպատվերով հրատարակված գրականություն է։

Հայկական տաղավարում հիմնականում կներկայացվեն վերջին 2 տարիներին հրատարակված Հայաստանի մշակույթը, ժառանգությունը ներկայացնող, թարգմանական, մանկական, ալբոմային գրականություն: Տաղավարում տեղադրված կլինեն նաև հայ տպագիր գրքի 500-ամյակը նշանավորող պաստառներ:

Ցուցահանդեսի շրջանակներում, սեպտեմբերի 4-ին տեղի կունենա ԱՊՀ երկրների գրքարվեստ միջազգային մրցանակաբաշխության դիպլոմների հանձնման արարողությունը:

Հայաստանից 2 գիրք միջազգային այդ մրցանակաբաշխությունում արժանացել է 1-ին կարգի դիպլոմի. Վան Խաչատուրի «Գույնը 14-19 դդ. հայ ճարտարապետության մեջ» ուսումնասիրություն-ալբոմը և Գագիկ Բաղդասարյանի «Երևան» ալբոմը: -0-