Եվրոպայի հեռարձակողների միությունը սկսել է քննել Ադրբեջանի Ազգային անվտանգության ծառայության կողմից Ադրբեջանի քաղաքացիների հարցաքննման փաստերը, ովքեր «Եվրատեսիլ-2009» մրցույթում քվեարկել են Հայաստանի ներկայացուցիչների օգտին, հաղորդում է Հայաստանի հանրային հեռուստատեսությունը:
«Ադրբեջանի Ազգային անվտանգության ծառայությունը հաստատել է «Եվրատեսիլ-2009» երգի միջազգային մրցույթի ընթացքում Հայաստանի օգտին քվեարկած քաղաքացիների հարցաքննման փաստը: Եվրոպան ևս հետևում է Ադրբեջանում տեղի ունեցող հետապնդումներին: Եվրախորհրդարանում Գերմանիայի ներկայացուցիչ, Գերմանիայի խորհրդարանի արտաքին կապերի հանձնաժողովի նախագահ Էլմար Բրոկը ВВС-ին ասել է, որ ԵՄ-ին կառաջարկվի իր դիրքորոշումն արտահայտել այդ հարցի շուրջ, նա ընդգծել է, որ ադրբեջանցի հեռուստադիտողների վրա ճնշում գործադրելու հիմքում ընկած են քաղաքական խնդիրները», - հաղորդում է ՀՀՀ-ն: Բրոկի խոսքերով, մարդիկ ավելի քաղաքակիրթ են, քան նրանց իշխանությունները: Նա ավելացրել է, որ ԵՄ-ն պետք է բողոք ներկայացնի Ադրբեջանի ԱԱԾ-ի գործողությունների վերաբերյալ և վերանայի այդ երկրի հետ հարաբերությունները:
Հայաստանի հանրային հեռուստառադիոընկերությունը պաշտոնական նամակով դիմել է Եվրոպայի հեռարձակողների միությանը, որն արդեն սկսել է քննել մրցույթի ընթացքում Հայաստանի օգտին քվեարկած անձանց հարցաքննման փաստը: Այս մասին տեղեկացրել է Հանրային հեռուստառադիոընկերության տնօրենի հատուկ նախագծերի խորհրդական Դիանա Մնացականյանը: Միությունում Մնացականյանին վստահեցրել են, որ անպայման կտեղեկացնեն քննության արդյունքների մասին ոչ միայն նրան, այլև Միության բոլոր 42 անդամ-երկրներին:
Մնացականյանն ասել է, որ քննության պատճառ է դարձել այն փաստը, որ Ադրբեջանի հեռախոսային օպերատորները երկրի ԱԱԾ-ին էին տրամադրել Հայաստանի օգտին քվեարկած բաժանորդների հեռախոսահամարները, և այդ բաժանորդները հարցաքննման էին հրավիրվել ԱԱԾ: Նրա խոսքերով, օպերատորներն իրավունք չունեին հրապարակել բաժանորդների հեռախոսահամարները, եթե նրանց նկատմամբ քրեական գործ հարուցված չէ:
Մնացականյանը կարծում է, որ նման կերպով մրցույթի տարբեր մասնակից-երկրները հայտնվում են անհավասար պայմաններում և կասկածի տակ է դրվում՝ արդյո՞ք Հայաստանը չի կորցնի իր մասնակիցների օգտին տրված ձայները հետագա եվրատեսիլների ընթացքում:
«Հայաստանում Ադրբեջանի օգտին քվեարկել է 1024 մարդ, և նրանցից ոչ ոք չի հրավիրվել ՀՀ ԱԱԾ: ՀՀ Ազգային անվտանգության ծառայությանը չի հետաքրքրում, թե ով է քվեարկել Ադրբեջանի օգտին, քանի որ Եվրատեսիլը երգի մրցույթ է», - ասել է նա:
Հայաստանը ներկայացնող Ինգա և Անուշ Արշակյանները Jan-Jan երգով Մոսկվայում անցկացված «Եվրատեսիլ-2009» մրցույթի արդյունքներով զբաղեցրեցին 10-րդ տեղը:
Հայաստանը մրցույթին մասնակցում է չորրորդ անգամ։ 2008 թ.-ին երգչուհի Սիրուշոն Եվրատեսիլ-2008-ում զբաղեցրեց չորրորդ տեղը։ Սիրուշոն գերազանցեց Հայաստանի նախորդ ներկայացուցիչներ Անդրեի (2006) և Հայկոյի (2007) արդյունքները, ովքեր նախորդ մրցույթներում զբաղեցրել էին ութերորդ տեղը։
«Եվրատեսիլ-2009» մրցույթի հաղթող ճանաչվեց նորվեգացի երգիչ Ալեքսանդր Ռիբակը, ով ներկայացնում էր Fairytale երգը: Երկրորդ տեղը զբաղեցրեց Իսլանդիան ներկայացնող երգչուհի Իոհաննան, երրորդ տեղը՝ Ադրբեջանը ներկայացնող դուետ Այսելն ու Արաշը:-0-
