Իտալիան պատրաստ է աջակցել Հայաստանին երկու խոշոր տրանսպորտային նախագծերի իրականացման գործում
Հայաստանում Իտալիայի դեսպան Բրունո Սկապինին ՀՀ տրանսպորտի և կապի նախարար Գուրգեն Սարգսյանի հետ հանդիպման ընթացքում հայտարարել է, որ կանի հնարավոր ամեն ինչ՝ Հայաստանում երկու խոշոր տրանսպորտային նախագծերի՝ «Հյուսիս-Հարավ» ավտոմայրուղու և երկաթգծի կառուցման գործում աջակցություն ցուցաբերելու համար:
Ինչպես երեքշաբթի «Նովոստի-Արմենիա» գործակալությանը տեղեկացրել է ՀՀ տրանսպորտի և կապի նախարարության մամուլի քարտուղար Սուսաննա Տոնոյանը, դիվանագետը նշել է, որ Իտալիայում կան երկաթուղու և ճանապարհների շինարարության ոլորտում մասնագիտացված հայտնի ընկերություններ, որոնք կարող են իրենց մասնակցությունն ունենալ նշված նախագծերի իրականացմանը:
Սկապինին այդ կապակցության նշել է, որ տրանսպորտային համակարգի զարգացումը կխթանի երկրի ընդհանուր զարգացմանը:
Նախարարն իր հերթին, ներկայացնելով դեսպանին այդ երկու նախագծերը, նշել է, որ վերջերս ՀՀ կառավարության որոշմամբ ստեղծված «Երկաթուղու շինարարության տնօրինություն» ՓԲԸ-ն կզբաղվի «Հյուսիս-Հարավ» երկաթուղու կառուցմանն առնչվող բոլոր հարցերով:
Դեսպանը հետաքրքրվել է նաև Հայաստանի հեռուստատեսության թվայնացման գործընթացով: Սկապինիի խոսքերով, քանի որ Իտալիան վերջերս է ամբողջությամբ անցել թվայնացման, ուստի այդ փորձը կարող է օգտակար լինել Հայաստանի համար:
Հայաստանի և Վրաստանի միջև «Հյուսիս-Հարավ» ավտոմոբիլային միջանցքի կառուցման տեխնիկական ուսումնասիրությունների անցկացումը ներառված է Զարգացման ասիական բանկի 2009թ. ծրագրերի մեջ, և այդ նախագծի իրականացման համար բանկն արդեն պատրաստվում է 1 միլիոն ԱՄՆ դոլարի դրամաշնորհ տրամադրել:
Իրան-Հայաստան երկաթուղին թույլ կտա Հայաստանին օգտվել էներգետիկ ռեսուրսներ և այլ ապրանքներ փոխադրելու այլընտրանքային ուղուց՝ ելք ունենալով դեպի արտաքին աշխարհ, մինչդեռ այժմ Հայաստանի երկաթուղային հաղորդակցությունն իրականացվում է միայն Վրաստանի միջով։
Նախնական տվյալներով՝ Իրան-Հայաստան երկաթուղային հաղորդակցության կառուցման մեջ իրականացվող ներդրումները կկազմեն 2 միլիարդ դոլար: Իրան-Հայաստան երկաթուղու կառուցմամբ հետաքրքրված են Համաշխարհային բանկը, Զարգացման ասիական բանկը, ինչպես նաև Ռուսաստանը, Իրանն ու Ուկրաինան:-0-
