Ադրբեջանացի հակերների՝ հայկական կայքերի վրա գրոհելու վերաբերյալ խուճապն անհիմն է. փորձագետներ
Ադրբեջանացի հակերների՝ հայկական կայքերի վրա գրոհելու վերաբերյալ խուճապն անհիմն է, կարծում են հայ փորձագետները՝ «Smart-Теch» ընկերության անվտանգության գծով փոխտնօրեն Ռուբեն Մուրադյանը և «Helix Consulting» ընկերության տնօրեն Արամ Մխիթարյանը։
Նախորդ շաբաթ արձանագրվել է, որ հայկական պետական, ինչպես նաև հասարակակամ կամ մասնավոր կայքերի վրա ադրբեջանական հակերների գրոհը կտրուկ կերպով աճել է:
«Նախկինում ավելի լուրջ գրոհներ են եղել, բայց դրան մեծ նշանակություն չի տրվել։ Ինձ համար շատ զարմանալի է, թե ինչու է նման մեծ ալիք բարձրացել այժմ»,- ասաց Մուրադյանը։
Մխիթարյանն իր հերթին ասաց, որ անվտանգությունը հաճախ ընկալվում է որպես մի ապրանք, որը մարդիկ կարող են գնել և կարծել, թե իրենց կայքերն անվտանգության մեջ են:
«Իրականում անվտանգությունն ապրանք չէ, այլ անսահման ընթացք։ Եթե մարդիկ կայք ունեն, ապա մշտապես պետք է զբաղվեն դրա անվտանգությամբ»,- նշեց Մխիթարյանը։
Նրա խոսքերով, հայկական կայքերի վրա գրոհները սովորական խուլիգանություն են։ «Դա չի նշանակում, որ մենք չպետք է մտածենք անվտանգության մասին, ավելի շուտ այդ գրոհները մեզ համար վերջին նախազգուշացումն են»,- նշեց Մխիթարյանը։ -0-
