Իշխող կուսակցությունը ներկայացնող պատգամավորը հերքեց Հայաստանի վարչապետի հնարավոր հրաժարականի վերաբերյալ լուրերը

ԵՐԵՎԱՆ, 15 օգոստոսի. /Նովոստի-Արմենիա/. Իշխող Հանրապետական կուսակցությունից ԱԺ պատգամավոր Լեռնիկ Ալեքսանյանը հերքեց տարածվող լուրերն այն մասին, թե նախագահ Սերժ Սարգսյանը պատրաստվում է փոխել կառավարության ղեկավարին։

«Ես այսօր չեմ տեսնում վարչապետին փոխելու խնդիր, քանի որ դրա անհրաժեշտությունը չկա»,- շաբաթ օրը լրագրողներին հայտնեց Ալեքսանյանը։

Պատգամավորը վստահություն հայտնեց, որ աշնանը լուրջ կադրային փոփոխություններ իշխանական կառույցներում չեն լինի։

«Չեմ կարծում, թե աշնանը իշխող կոալիցիայի կադրային քաղաքականությունում որևէ լուրջ փոփոխություն լինի»,- ասաց Ալեքսանյանը՝ չբացառելով միաժամանակ իշխանական կառույցների համալրումը պրոֆեսիոնալ կադրերով։

Խոսելով ընդդիմության դերի մասին՝ պատգամավորն ասաց, որ Հայաստանի իշխանություններն այսօր հզոր ընդդիմության կարիք ունեն, քանի որ դրա օգնությամբ կարելի է հզոր պետություն կառուցել։
 
Նա առաջարկեց ընդդիմությանը, մասնավորապես, ՀԱԿ-ին մշակել գործողությունների կառուցողական ծրագիր, որը կբխի հասարակության շահերից, այլ ոչ թե ռևանշիստական և շահադիտական նպատակներ կհետապնդի։ -0-