ԵՐԵՎԱՆ, 13 օգոստոսի. /Նովոստի-Արմենիա/. Օդի ջերմաստիճանը Հայաստանում 1935-2007 թվականներին բարձրացել է միջինը 0,6 աստիճանով ըստ Ցելսիուսի, իսկ Երևանում՝ 0,85 աստիճանով, ասաց Հայհիդրոմետ ծառայության փոխտնօրեն Համլետ Մելքոնյանը։
«Ջերմաստիճանի փոփոխության գնահատականներն անցկացվում են Հայաստանում համաշխարհային առաջատար ինստիտուտների օժանդակությամբ, մենք ունենք տվյալների բազա, իսկ նրանք՝ առաջատար տեխնոլոգիաներ և մոդելներ, որոնք մենք կիրառում ենք մեր երկրում»,- ասաց նա հինգշաբթի «Նովոստի» միջազգային մամուլի կենտրոնում՝ պատասխանելով «Նովոստի-Արմենիա» գործակալության հարցին։
Նշելով, որ կլիմայի գլոբալ փոփոխությունը համաշխարհային մասշտաբով՝ սկսած անցյալ դարի 60-ական թվականներից, պայմանավորված է մարդու արդյունաբերական գործունեությամբ և կլիմայի վրա անտրոպոգեն ազդեցությամբ, Մելքոնյանն ասաց, որ այդ փոփոխությունները կապված են ջերմոցային գազերի արտանետումների հետ, ինչը ջերմոցային էֆեկտ է ստեղծում մթնոլորտի մերձերկրյա շերտերում։
Նա պարզաբանեց, որ կլիմայի և ջերմաստիճանի այդ փոփոխությունները ֆիքսվում են մետեորոլոգիական բազմաթիվ կայանների կողմից, որոնց արդյունքների համապատասխան՝ 1860 թվականից սկսած ժամանակահատվածում Երկրի ջերմաստիճանը միջին հաշվով աճել է 0,6 աստիճանով։
«Ջերմաստիճանի այս, առաջին հայացքից չնչին փոփոխությունն իր հետ բավականին զգալի հետևանքներ է բերում, որոնք վերջին ժամանակներս լուրջ քննարկումների առարկա են դարձել, այդ թվում՝ պարբերաբար գումարվող կլիմայական համաժողովների շրջանակներում»,- ասաց նա՝ հավելելով, որ ՄԱԿ-ը 1995 թվականին հաստատել է կլիմայի փոփոխության շրջանակային հայեցակարգ, որն այլ երկրների թվում վավերացրել է նաև Հայաստանը։
Փոխտնօրենի խոսքերով՝ Հայհիդրոմետ ծառայությունը մշտական կապի մեջ է Հայաստանի բոլոր պետական կառույցների հետ և կլիմայական փոփոխությունների կանխատեսումների միջոցով փորձում է օժանդակություն ցուցաբերել իշխանություններին համապատասխան որոշումների ընդունման հարցում։
«Կլիմայի փոփոխություններն ազդում են տնտեսության ամենատարբեր բնագավառների, այդ թվում՝ ջրային ռեսուրսների, գյուղատնտեսության, էներգետիկայի վրա»,- ասաց Մելքոնյանը։ --0--
