Հայաստանում ամառվա վերջն առավելապես առանց տեղումների կլինի, ջերմաստիճանն էլ կլինի նորմայի սահմաններում. Հայպետհիդրոմետ

ԵՐԵՎԱՆ, 13 օգոստոսի. /Նովոստի-Արմենիա/. Հայաստանում ամառվա վերջն առավելապես առանց տեղումների կլինի, ջերմաստիճանն էլ կլինի նորմայի սահմաններում, ասաց «Հայպետհիդրոմետ» ծառայության օդերևութաբանության կենտրոնի պետ Զարուհի Պետրոսյանը:

«Հայաստանում, բացառությամբ հյուսիսային շրջանների, առավելապես առանց տեղումների պարզ եղանակ կպահպանվի մինչև օգոստոսի 19-ը: Օգոստոսի 20-23-ին հանրապետությունում, ըստ ամենայնի, տեղումներ կլինեն, և ջերմաստիճանի իջեցում կգրանցվի, իսկ օգոստոսի վերջը կանխատեսվում է առանց տեղումների, օդի ջերմաստիճանը նորմայի սահմաններում՝ միջինը 32 աստիճան տաքություն»,- հինգշաբթի «Նովոստի» միջազգային մամուլի կենտրոնում ասաց նա:

Օգոստոսի 9-12-ն ընկած հատվածում Հայաստանում նկատվում էր ջերմաստիճանի իջեցում միջինը 4-7 աստիճանով և գրեթե համատեղ տեղումներ, ինչը պայմանավորվում էր հյուսիս-արևմուտքից առավել սառը օդային զանգվածների ներխուժմամբ հանրապետության տարածք:

Պետրոսյանը նշեց, որ օգոստոսի վերջում Հայաստանի հարթավայրային շրջաններում սպասվում է 30-32 աստիճան տաքություն, իսկ լեռնային շրջաններում՝ 25-26 աստիճան:

Կենտրոնի պետը հայտնեց նաև, որ այսօրվա դրությամբ Սևանա լճի ջրի ջերմաստիճանը հասել է 19-20 աստիճանի: 

«Սևանի ջրի ջերմաստիճանն առավելագույն ցուցանիշների կհասնի օգոստոսի 15-17-ին, երբ գրանցվի 24-25 աստիճան տաքություն»,- ասաց նա՝ չբացառելով երեկոյան ժամերին տեղումների հավանականությունը:  
 
Պետրոսյանն ընդգծեց, որ Հայպետհիդրոմետի բոլոր կանխատեսումները նախնական են և լրացուցիչ հստակեցման կարիք ունեն: -0-