ԵՐԵՎԱՆ, 12 օգոստոսի. /Նովոստի-Արմենիա/. Լեռնային Ղարաբաղի անցումային կարգավիճակը կարող է վտանգ կրել հայկական կողմի համար, կարծում է հայ քաղաքագետ Սերգեյ Շաքարյանցը: «Ի՞նչ է անցումային կարգավիճակը: Ես ուսումնասիրել եմ, թե ինչ կարող է լինել անցումային կարգավիճակի հետ և պարզել եմ, որ ոչ միշտ է այն ավարտվում լիակատար անկախությամբ: Շատ դեպքերում այն հանգեցրել է Արևմուտքի կողմից կազմակերպված ջարդերի այդ տարածքում»,- հայտարարեց նա: Շաքարյանցն օրինակ բերեց Սուդանի Դարֆուր նահանգի իրավիճակը:
Քաղաքագետի կարծիքով մտահոգություն են առաջ բերում նաև ԵԱՀԿ ՄԽ ամերիկացի համանախագահ Մեթյու Բրայզայի՝ յոթ շրջանները Ադրբեջանին վերադարձնելու մասին հայտարարությունները: Նրա խոսքերով, Լաչինի հարցը հանված է բանակցային գործընթացից, այն պետք է ապահովի Հայաստանի ու Ղարաբաղի կապը և չի մտնում անվտանգության գոտու մեջ, «և ամեն դեպքում այն պետք է այլ կարգավիճակ ունենա»:
Շաքարյանցը չի բացառում, որ այդ դեպքում խոսքը կարող է Շուշիի շրջանը Ադրբեջանին վերադարձնելու մասին լինի:
Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:
Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրեցին նրան, որ վերացավ հսկողությունը ոչ միայն Լեռնային Ղարաբաղում, այլև հարակից յոթ շրջանում:
1994թ. մայիսի 12-ին զինադադարի վերաբերյալ կնքված եռակողմ համաձայնագրից հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ մահացավ շուրջ 25-30 հազար մարդ, և մոտ մեկ միլիոնն ստիպված լքեց բնօրրանը:
Հրադադարի ռեժիմ հաստատելու վերաբերյալ համաձայնագիրը մինչ այսօր ուժի մեջ է: 1992 թվայանից ի վեր հակամարտության խաղաղ կարգավորման ուղղությամբ բանակցություներ են տարվում ԵԱՀԿ Մինսկի խմբի շրջանակներում, որոնց համանախագահներն են ԱՄՆ-ն, Ռուսաստանը և Ֆրանսիան:-0-
