ԵՐԵՎԱՆ, 12 օգոստոսի. /Նովոստի-Արմենիա/. Հայաստանում ԱՄՆ դեսպանատունը առայժմ տվյալներ չունի ղարաբաղյան հակամարտության կարգավորման գծով ԵԱՀԿ ՄԽ ամերիկացի համանախագահի հնարավոր փոխարինման մասին, «Նովոստի-Արմենիա» գործակալությանը հայտնեցին Հայաստանում ԱՄՆ դեսպանատան մամուլի ծառայությունից:
«Առայժմ հայտնի է, որ Մեթյու Բրայզան ԱՄՆ պետքարտուղարի տեղակալի օգնականի պաշտոնում կփոխարինի Թինա Քեյդենաուին, սակայն անհայտ է, թե նա կփոխարինի արդյոք Բրայզային ԵԱՀԿ ՄԽ-ում: Եթե մենք պաշտոնական տեղեկատվություն ունենանք, այն անհապաղ կհրապարակվի»,- հայտնեց գործակալության զրուցակցուհին:
Թինա Քեյդենաուն, ում նախորոշում են Բրայզայի պաշտոնի համար, ավելի վաղ աշխատել է Կոսովոյում ԱՄՆ առաքելությունում, այնուհետև եղել Կոսովոյում ԱՄՆ դեսպան, մինչ այդ Քեյդենաուն ԱՄՆ առաքելության ղեկավար է աշխատել Սարաևոյում:
Մեթյու Բրայզան արդեն 3 տարի է զբաղեցնում է ԵԱՀԿ ՄԽ համանախագահի պաշտոնը: Ներկայում լուրեր են պտտվում Բրայզային Ադրբեջանում ԱՄՆ դեսպան նշանակելու մասին:
ԵԱՀԿ Մինսկի խումբը, որի համանախագահներն են ԱՄՆ-ն, Ռուսաստանն ու Ֆրանսիան, 1992թ.-ից զբաղվում է Լեռնային Ղարաբաղի հակամարտության կարգավորմամբ:
Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:
Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրեցին նրան, որ վերացավ հսկողությունը ոչ միայն Լեռնային Ղարաբաղում, այլև հարակից յոթ շրջանում:
1994թ. մայիսի 12-ին զինադադարի վերաբերյալ կնքված եռակողմ համաձայնագրից հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ մահացավ շուրջ 25-30 հազար մարդ, և մոտ մեկ միլիոնն ստիպված լքեց բնօրրանը:
Հրադադարի ռեժիմ հաստատելու վերաբերյալ համաձայնագիրը մինչ այսօր ուժի մեջ է: 1992 թվայանից ի վեր հակամարտության խաղաղ կարգավորման ուղղությամբ բանակցություներ են տարվում ԵԱՀԿ Մինսկի խմբի շրջանակներում, որոնց համանախագահներն են ԱՄՆ-ն, Ռուսաստանը և Ֆրանսիան:-0-
