Երևանյան ՋԷԿ-ի համար ԱՆ-225 ինքնաթիռով գազատուրբինային գեներատոր է Հայաստան բերվել

ԵՐԵՎԱՆ, 12 օգոստոսի. /Նովոստի-Արմենիա/. Չորեքշաբթի Երևանի «Զվարթնոց» օդանավակայան է բերվել գազատուրբինային գեներատոր երևանյան ՋԷԿ-ում կոմբինատիվ ցիկլի նոր ժամանակակից շոգեգազային էներգաբլոկի շինարարության ծրագրի շրջանակներում, հայտնեց ՀՀ էներգետիկայի և բնական պաշարների նախարարության տեղեկատվության ու հասարակայանության հետ կապերի բաժնի պետ Շաքե Առաքելյանը: 

«Գեներատորն առաքվել է Գերմանիայից ԱՆ-225 տեսակի ինքնաթիռով, որը միակն է իր ձևի մեջ: Գազատուրբինային գեներատորի քաշը 198 տոննա է, ինչը համարվում է վերջնակետային բեռ տվյալ տեսակի ինքնաթիռի համար»,- չորեքշաբթի Առաքելյանն ասաց «Նովոստի-Արմենիա» գործակալությանը՝ հավելելով, որ ինքնաթիռը «Զվարթնոց» օդանավակայանում իջել է տեղական ժամանակով 9.05-ին:   

Նրա խոսքերով, գեներատորի առաքումը Երևան կապահովի շոգեգազային էներգաբլոկի շինարարության անցկացումը ժամանակացույցի համաձայն:

«Ենթադրվում էր, որ Երևանի ՋԷԿ-ի նոր էներգաբլոկը շահագործման կհանձնվի մինչև 2010 թ.-ի ապրիլի 30-ը, և գեներատորի ժամանումը Երևան վստահություն է ներշնչում, որ շինարարությունը կավարտվի ծրագրված ժամկետում»,- պարզաբանեց նա:  

Ընդ որում բաժնի պետը հայտնեց նաև, որ օգոստոսի 14-ին կամ 15-ին ԱՆ-225 ինքնաթիռը ևս մեկ չվերթ կկատարի Երևան, որով հայկական մայրաքաղաք կբերվի գազատուրբինային տրանսֆորմատոր:

«Այդպիսով կավարտվի երևանյան ՋԷԿ-ում կոմբինատիվ ցիկլի շոգեգազային էներգաբլոկի համար գերծանր բեռների փոխադրումը»,- ասաց նա: Առաքելյանը նշեց, որ, ըստ ամենայնի, բեռն արդեն հասցվել է շինհրապարակ:

Երևանի ՋԷԿ-ը նախագծվել ու կառուցվել է 1963-67 թթ.-ին: Կայանի անվանական հզորությունը 550 ՄՎտ է կազմում: Այսօր գործում է ՋԷԿ-ի 7 ագրեգատից միայն մեկը՝ 50 ՄՎտ հզորությամբ: 

Տվյալ պահին երևանյան ՋԷԿ-ում կոմբինատիվ ցիկլի նոր ժամանակակից շոգեգազային էներգաբլոկի շինարարության աշխատանքներ են տարվում, որը ծրագրվում է կոմերցիոն շահագործման հանձնել 2010 թ.-ի ապրիլի վերջին: -0-