Ամերիկացի հանրաճանաչ կիթառահար Սթենլի Ջորդանը վարպետության դաս է անցկացրել հայ երաժիշտների համար

ԵՐԵՎԱՆ, 11 օգոստոսի. /Նովոստի-Արմենիա/. Ամերիկացի հանրաճանաչ ջազ երաժիշտ Սթենլի Ջորդանը Երևանում իր համերգի նախօրեին երեքշաբթի «Մալխաս» ջազ-ակումբում վարպետության դաս է անցկացրել, որին մասնակցել են շուրջ 20 երաժիշտներ:

Ջորդանը խոսել է կիթառ նվագելու իր հմտությունների և համերգներին պատրաստվելու համակարգի մասին: Նա կոչ է արել նրանց հատուկ ուշադրություն դարձնել երաժշտությամբ ջանասիրաբար զբաղվելուն, քանի որ «պարապմունքների ընթացքում դուք կարող եք անել այն, ինչը չեք կարող անել համերգի ժամանակ՝ ելնելով այն վախից, որ հանդիսատեսը կձանձրանա»:

Սթենլի Ջորդանի համերգը Երևանում կազմակերպել է Հայաստանում ԱՄՆ դեսպանատունը ՀՀ Մշակույթի նախարարության և «Հայկական ջազ-70» կազմակերպության աջակցությամբ:

Սթենլի Ջորդանն ինքնատիպ ու տաղանդավոր ամերիկացի ջազ- և ֆյուժն- կիթառահար է: Դեռևս 1985 թվականից, երբ թողարկվեց նրա առաջին «Մոգական հպում» (Magic Touch) Գրեմի մրցանակի առաջադրված ոսկե սկավառակը, Ջորդանը դարձավ նորարարական ուժ պրոգրեսիվ գործիքային երաժշտության ասպարեզում:  «Հպումի» ու «մատնահարվածի» վարժ կատարողական տեխնիկայի միջոցով, որը հնարավորություն է տալիս միաժամանակ ռիթմ և մեղեդի արտաբերել, Ջորդանը վարպետորեն միահյուսում է դասականը, ջազն ու ռոքը` սփռելով անդորր ու ներդաշնակություն: -0-