«Ոսկե ծիրան» անիվների վրա կինոփառատոնը կանցկացվի Ղարաբաղում և Ջավախքում

ԵՐԵՎԱՆ, 11 օգոստոսի. /Նովոստի-Արմենիա/. «Ոսկե ծիրան» անիվների վրա  կինոփառատոնը հյուրախաղերի կմեկնի Ղարաբաղի, Ջավախքի շրջաններով, Հայաստանի քաղաքներով և գյուղերով, երեքշաբթի լրագրողներին հայտնեց «Ոսկե ծիրան» երևանյան միջազգային կինոփառատոնի տնօրեն, ռեժիսոր Հարություն Խաչատրյանը։

«Այս տարի «Ոսկե ծիրան» անիվների վրա փառատոնը երկրորդ անգամ կանցկացվի Ջավախքում (օգոստոսի 12-16) և երրորդ անգամ ԼՂՀ-ում (օգոստոսի19-23), որտեղ կներկայացվեն «Ոսկե ծիրան» վեցերորդ միջազգային կինոփառատոնի լավագույն ֆիլմերը»,- ասաց Խաչատրյանը։

«Ոսկե ծիրան» վեցերորդ միջազգային կինոփառատոնն անցկացվեց Երևանում հուլիսի 12-19-ը։ «Ոսկե ծիրան» փառատոնի գլխավոր մրցանակը ստացավ վրացի ռեժիսոր Գեորգի Օվաշվիլին «Մյուս ափը» ֆիլմի համար։

Խաչատրյանի խոսքերով՝ «փառատոնն անիվների վրա» կայցելի նաև Հայաստանի մի քանի քաղաքներ և գյուղեր՝ Լոռի, Կապան, Օձուն, Ալավերդի։

Մամուլի ասուլիսին ներկա գտնվող ՀՀ ԳԱԱ պատմության ինստիտուտի տնօրեն Աշոտ Մելքոնյանը, ողջունելով փառատոնի անցկացումը, ընդգծեց նմանատիպ մշակութային միջոցառումների նշանակությունը մասնավորապես Ջավախքում, որտեղ մարդիկ ավելի շատ ունեն մշակութային, քան նյութական օժանդակության կարիք։

«Մշակույթը, տվյալ դեպքում, կինոարվեստը կարող է իսկապես կապող օղակ դառնալ Հայաստանի և Վրաստանի միջև»,- ասաց Մելքոնյանը։

Պատմաբանի կարծիքով՝ Ջավախքը կարող է բարեկամության կամուրջ դառնալ երկու ժողովուրդների միջև, ոչ թե անջրպետ։

«Փառատոնի ծրագիրը կազմվել է՝ նկատի առնելով հանդիսատեսի կարծիքն ու ցանկությունները»,- իր հերթին ասաց փառատոնի ծրագրերի տնօրեն, ռեժիսոր Արա Խանջյանը։

Նրա խոսքերով՝ նկատի ունենալով հայկական կինոյի նկատմամբ մեծ հետաքրքրությունը, ծրագրում ընդգրկվել են հիմնականում տարբեր սերունդների հայ ռեժիսորների ֆիլմերը։

«Հանդիսատեսի խնդրանքով, ինչպես նաև նկատի ունենալով այն, որ այս տարի նշվում է Սերգեյ Փարաջանովի «Նռան գույնը» լեգենդար ֆիլմի 40-ամյակը՝ ֆիլմն առաջին անգամ կցուցադրվի Արցախում»,- ասաց Խանջյանը։

Փառատոնում կներկայացվեն «Ոսկե ծիրան» երևանյան վեցերորդ կինոփառատոնի մասնակից-ֆիլմերը։

Անիվների վրա փառատոնը կանցկացվի Հայաստանի մշակույթի նախարարության, ԼՂՀ  մշակույթի և երիտասարդության հարցերի նախարարության աջակցությամբ։ Փառատոնի գլխավոր հովանավորն է VivaCell MTS ընկերությունը։ -0-