ՀՀ ոստիկանությունը ձերբակալել է մի տղամարդու՝ կեղծ թղթադրամներ պատրաստելու կասկածանքով

ՀՀ ոստիկանության աշխատակիցները ձերբակալել են մի երիտասարդ տղամարդու՝ կեղծ թղթադրամներ պատրաստելու կասկածանքով, հաղորդում է ՀՀ ոստիկանության մամուլի ծառայությունը:

«Օգոստոսի 6-ին ԿՀԴՊ գլխավոր վարչություն բերման է ենթարկվել 24-ամյա Գոռ Մ.-ն, ով պատրաստվում էր իրացնել 1.000 և 5.000 դրամ անվանական արժողության (ընդհանուր գումարով՝ 28.000 դրամ) կեղծ թղթադրամներ», - ասվում է տեղեկատվության մեջ:

Իրավապահ մարմինների աշխատակիցները պարզել են, որ կեղծ թղթադրամները գունավոր տպիչով տպագրել է 30-ամյա Արթուր Ս.-ն և դրանք հանձնելով Գոռ Մ.-ին՝ պահանջել, որ իրացնի դրանք, ինչի դիմաց իրեն պետք է տար 10.000 դրամ:

«Արթուր Ս.-ն բերման է ենթարկվել բաժին, որտեղ պարզվել է, որ նա համանման եղանակով նախկինում 3 անգամ պատրաստել և Գոռ Մ.-ի միջոցով Երևանի գյուղմթերքների շուկաներում իրացրել է շուրջ 53.000 դրամ (շուրջ 142 դոլար)` 1.000 և 5.000 դրամ անվանական արժողության կեղծ թղթադրամներ», - ասվում է տեղեկատվության մեջ:

Ինչպես նշվում է տեղեկատվության մեջ, Արթուր Ս.-ի բնակարանում հայտնաբերվել է 18 հատ 1.000 և 4 հատ 5.000 դրամանոց կեղծ թղթադրամ, իսկ նրա քրոջ` Կարինե Ս.-ի տնից՝ «Canon» տեսակի գունավոր տպիչ, որով Արթուր Ս.-ն տպագրել է կեղծ թղթադրամները:

«Նախապատրաստված նյութերն ուղարկվել են ոստիկանության Երևան քաղաքի քննչական վարչություն», - ասվում է տեղեկատվության մեջ:-0-