Տեղեկատվական վահանակներ են տեղադրվել հայկական միջնադարյան Սևանի վանքում

Բազմալեզու տեղեկատվական վահանակներ են տեղադրվել  հայկական միջնադարյան նշանավոր ճարտարապետական համալիրներից մեկում` Սևանի վանքում «Ճանաչեք հայկական հուշարձանները» (ԱՄԱՓ) ծրագրի շրջանակներում, «Նովոստի-Արմենիա» գործակալությանը տեղեկացրեցին VivaCell-MTS ընկերության մամուլի ծառայությունից:

AMAP հասարակական կազմակերպության (Armenian Monuments Awareness Project) կողմից իրականացվող ծրագիրը ֆինանսավորվում է գլխավոր հովանավոր ՎիվաՍել-ՄՏՍ-ի, USAID/CAPS-ի և Գյումրիում Իտալիայի պատվո հյուպատոսի կողմից: Ծրագրի աշխատանքային գործընկերն է  ՀՀ Մշակույթի նախարարությունը:

Ծրագրի հիմնական նպատակն է Հայաստանի բնակչությանը և Հայաստան այցելող զբոսաշրջիկներին ներկայացնել Հայաստանի պատմամշակութային և բնության հարուստ ժառանգությունը, նպաստել պատմական և տեսարժան վայրերի մեկնաբանմանը` խթանելով զբոսաշրջության զարգացմանը Հայաստանում:

Սևանավանքը թվով յոթերորդ վայրն է, որտեղ այս տարվա ընթացքում տեղադրվել են վահանակներ և թվով տասներկուերորդը` ամբողջ ծրագրի ընթացքում` սկսած 2008 թվականից:

2009 թ. ծրագիրը նաև ներառելու է բաղադրիչ` հաշմանդամ երեխաների համար  Բրայլյան վահանակներ են տեղադրվելու և 1400 բազմալեզու բրայլյան թերթիկներ են պատրաստվելու:

Սևանավանքը (նաև հայտնի է «Մարիամաշեն» անունով) հիմնադրվել է Սևանա լճի կղզում (այժմ` թերակղզի), Սևան քաղաքից դեպի արևելք: Պեղումների արդյունքում պարզվել է, որ այս վայրը բնակեցված է եղել դեռևս նոր քարի և բրոնզի դարերում: Համալիրը բաղկացած է Սբ.Առաքելոց և Սբ.Կարապետ եկեղեցիներից, գավթի ավերակներից, մասնակի վերակառուցված վանական խցերից, Սբ.Հարություն եկեղեցու հիմքերից:-0-