Դեղորայքը Հայաստանից հնարավոր է արտահանել առանց առողջապահության նախարարության հավաստագրի

Հայաստանի կառավարությունը հինգշաբթի նիստի ժամանակ որոշում ընդունեց դեղորայք արտահանողներին ազատել Առողջապահության նախարարությունից հատուկ սերտիֆիկատ ստանալու պարտավորությունից:

Ինչպես հայտնեց Հայաստանի էկոնոմիկայի նախարար Ներսես Երիցյանը, այժմ  արտահանողները Առողջապահության հավաստագիրը կստանան ըստ ցանկության կամ այն դեպքում, երբ տվյալ փաստաթղթի առկայությունը պարտադիր է այն երկրում, ուր արտահանվում է ապրանքը։

Էկոնոմիկայի նախարարության ղեկավարը տեղեկացրեց, որ Առողջապահության նախարարության հավաստագիրը պարտադիր չէ նաև դեղագործական նպատակների համար չնախատեսված ապրանքի ներկրման դեպքում։

Երիցյանի խոսքերով՝ ներկրողը պարզապես ապրանքի վրա մակնշում է դնում՝ «նախատեսված չէ դեղագործական նպատակների համար»։

«Կառավարության նման որոշումն ուղղված է բիզնես-միջավայրի և ձեռներեց  գործունեության, մասնավորապես, շինարարության ոլորտի բարելավմանը»,- ասաց նախարարը՝ նշելով, որ շինարարական ընկերությունները բախվել են բարդությունների ներկրման ժամանակ, օրինակ, գիպսի ներկրման պարագայում։ -0-