Ռիժկովը կարծում է, որ ԱՊՀ-ն փոփոխությունների կարիք ունի

ՌԴ Դաշնային խորհրդի անդամ, հայ-ռուսական միջխորհրդարանական համագործակցության հանձնաժողովի համանախագահ Նիկոլայ Ռիժկովը կարծում է, որ ԱՊՀ-ն փոփոխությունների կարիք ունի:

«Պարզ է, որ այն առաջարկությունները կամ ցանկությունները, որոնք արտահայտվել են Ալմա-Աթայի խորհրդակցության ժամանակ, որտեղ ստեղծվել է ԱՊՀ-ն, այլևս գոյություն չունեն, դրանք պարզապես չեն իրագործվել», - ասել է Ռիժկովը «Գոլոս Ռոսիի» ռադիոկայանի կազմակերպած Երևան-Մոսկվա ռադիոկամուրջի ժամանակ:

«Մոտավորապես քսան տարի առաջ այն պարոնայք, ովքեր պետությունների ղեկավարներ էին, խոսում էին սահմանների թափանցիկության մասին: Ու՞ր են այդ թափանցիկ սահմանները: Չկան: Խոսում էին միասնական բանակի, միասնական արժույթի մասին, դա էլ չկա: Ես հիշում եմ՝ ինչի մասին էր խոսվում Ալմա-Աթայում 1991 թ.-ին: Այդ ամենը չի իրագործվել», - ավելացրել է Ռիժկովը:

Նրա խոսքերով՝ Ռուսաստանում կան մարդիկ, ովքեր խոսում են Խորհրդային Միության վերականգնման անհրաժեշտության մասին:

«Ես նրանց վերաբերում են որպես մարդ, ով զգում է, որ նրանք ապրում են մեկ այլ, ոչ իրական աշխարհում: Նման մարդիկ շատ չեն: Այսօր անհնար է վերականգնել Խորհրդային Միությունն այն տեսքով, որով նա գոյություն է ունեցել: Դա և քաղաքացիական պատերազմներն են և ինչ ասես: Սակայն մեծ սխալ է նաև թողնել ԱՊՀ կառույցը նույն տեսքով այնպես, ինչպես այն գոյություն ունի գրեթե քսան տարի և հուսալ, որ այդ կառույցն ինչ-որ բանի կհանգեցնի», - կարծում է ռուս դիվանագետը:

Նրա խոսքերով՝ անհրաժեշտ է որպես հիմք ընդունել եվրոպական կառույցը, որն այս հարցում հսկայական փորձ է կուտակել՝ չդիպչելով որևէ պետության ինքնավարությանը:

Միաժամանակ Ռիժկովը հիշեցրել է, որ այնտեղ գործում է միասնական արժույթ, ապրանքի ազատ շարժ, քվոտավորման համակարգ:

«Անհեթեթություն է, որ շուկան ինքը կկարգավորվի: Դրանք գայդարական, մանկական խաղեր են: Մենք վաղուց պետք է դա մոռանայինք», - ասել է ռուս դիվանագետն՝ ավելացնելով, որ եվրոպական կառույցը տարբերվում է նրանով, որ «նրանք ինքնակամ տալիս են իրենց գործառույթների մի մասը մեկ այլ ընդհանուր մարմնի», մասնավորապես՝ գործում է խորհրդարան, գործադիր մարմին:

Նրա խոսքերով՝ երբ տասը տարի առաջ առաջարկում էին ԱՊՀ ակումբի փոխարեն ստեղծել որևէ վերահսկվող մարմին, քաղաքական գործիչներն ուշագնաց էին լինում:

Ռիժկովը կարծում է, որ դրությունն անելանելի չէ, սակայն անհրաժեշտ է քաղաքական կամք գտնել՝ անկեղծ ասելու, որ այս համակարգը ոչնչի չի հանգեցնի, սակայն կա այնպիսի համակարգ, որը կկարողանար աշխատել՝ հանուն Համագործակցության բոլոր երկրների:-0-